Af fiskveiðum, ungliðahreyfingu og framboðsmálum

Það er eiginlega hálf ótrúlegt að vera sjómaður um þessar mundir. Svæðið við Vestmannaeyjar, alveg frá Kantinum og upp í fjöruborð, er svo sneisafullt af loðnu að annað eins hefur ekki sést í mörg ár, og alveg með ólíkindum að Hafró skyldi ekki leyfa mönnum að nýta meira af þessu. Sömuleiðis heyrir maður fréttir af heilu fjörðunum fyrir vesturlandi, sneisafullum af síld og svo mikið er magnið að heimamenn tala um að það sé nánast hægt að ganga á torfunum.

Sama ástand virðist vera í flest öllum bolfiskstegundum og eru margar minni útgerðir fyrir löngu búnar með sinn kvóta og á sama tíma eru þeir sem eiga mestu kvótana farnir að skipa mönnum að sigla í land og í raun og veru má segja sem svo, að aldrei nokkurn tímann hafi fiskveiðum verið stjórnað jafn mikið og núna af þeim sem stjórna fiskvinnslunum í landi. Þetta er í samræmi við verulega minnkaðar aflaheimildir, en í alla staða í algjöru ósamræmi við ástandið á miðunum, en það er nú einu sinni svo að það var því miður aðeins einn stjórnmálaflokkur sem er með það í stefnuskrá sinni að endurskoða öll vinnubrögð Hafró og aðferðir við mælingar á stofnstærðum og m.a. að fá til þess utan að komandi sérfræðinga sem ekki er hægt að spila á í gegnum einhverskonar pólitík og sérhagsmuni. Vonandi fara núverandi stjórnvöld að sýna smá kjark í þessum málum, því oft hefur verið þörf en nú er nauðsynlegt að fara að bæta við aflaheimildir í flest öllum tegundum. 

Ég fékk mjög sérstaka spurningu um daginn frá ungri konu sem spurði mig tveggja spurninga, í fyrsta lagi: Hversvegna er engin ungliða hreyfing á vegum flokkana hér í Vestmannaeyjum sambærileg og í mótvægi við Eyverja hjá Sjálfstæðismönnum? Og í öðru lagi: Hefðu þið Frjálslyndir einhvern áhuga á að stofna ungliðahreyfingu? 

Ég hef velt þessu fyrir mér í töluverðan tíma og spurði m.a. kunningja minn úr V-listanum þessarar fyrri spurningar og fékk það svar, að þeir hefðu ekki áhuga á þessu, enda væri þetta frekar ógeðfellt allt saman. Ekki fékk ég nánari útskýringu á því, en ég verð þó að viðurkenna það að þegar maður skoðar hvaðan og hverjum þetta unga fólk, sem skipar stjórn Eyverja tengist þá sýnist mér þetta vera að mestu leyti ungt fólk sem að tengist inn í ákveðnar ættir sem oft á tíðum tengjast beint eða óbeint útgerð, eða þá ættum sem oft á tíðum hafa haft ákveðinn forgang í störf bæði á vegum bæjarins og hina ýmsu stofnana. Kannski má segja sem svo, að þegar maður ber saman muninn á Sjáfstæðis og Frálslyndaflokknum, þá er munurinn kannski helst sá að Sjáfstæðisflokkurinn hefur starfað meira og minna alla síðust öld og byggir þar með á gömlum hefðum, sem þó vissulega hafa þurft að víkja að einhverju leyti vegna einkavinavæðingarinnar s.l. tvo áratugi eða svo og kannski má segja sem svo, að þegar maður nær að fylgjast með vinnubrögðum Sjálfstæðismanna á þingi, sem eins og allir vita, fá gríðarlegar fjárhæðir frá sérhagsmunaaðilum í sjávarútvegi, þá er það svo sannarlega satt og rétt að þeir vinna fyrir hverri einustu krónu. Frjálslyndi flokkurinn hins vegar, er aðeins 10 ára gamall og beið afhroð í síðustu kosningum. Munurinn er hins vegar fyrst og fremst sá að við þurfum ekki að verja neina sérhagsmuni eða taka tillit til þess, hverjir standa á bak við flokkinn, enginn borgar okkur fyrir neina sérhagsmuni og við getum því tjáð okkur óhikað og frjálst um öll málefni og sem dæmi úr sjávarútvegsgeiranum, á meðan Sjáfstæðisflokkurinn er að verja fyrst og fremst sérhagsmuni þeirra sem telja sig eiga fiskinn í sjónum, þá teljum við Frjálslynd að þjóðin öll eigi fiskinn og eigi öll að njóta góðs af því. 

Varðandi seinni spurninguna, þá væri nú bara gaman að því að stofna ungliðahreyfingu Frjálslyndra hér í eyjum og gæti ég m.a. útvegað húsnæði fyrir slíka starfsemi, en til þess að svo yrði þá yrði að koma til ákveðinn hópur ungs fólks, sem yrði að vera algjörlega sjálfstæður peningalega en þess má geta að nýlega var endurvakin ungliðahreyfing Frjálslyndaflokksins á landsvísu og á formaður hennar rétt á að sitja í miðstjórn, en fyrir þá sem hafa áhuga á að skrá sig í hana, þá eru nánari upplýsingar um það inni á xf.is.

Að lokum aðeins um framboðsmálin hér í vor. Líkurnar á því að við Frjálslynd bjóðum fram í samstarfi við aðra flokka hafa minnkað verulega að undanförnu og margt bendir því til þess að við bjóðum fram ein og sér, en endanleg ákvörðun um það verður tekin annaðhvort á landsþinginu um næst helgi, eða í síðasta lagi um næstu mánaðarmót.

Meira seinna.

Athugasemdir

[Jarl Sigurgeirsson, 17.3.2010 kl. 13:59]

Væri ekki nær í stað þess að ráðast að því sem vel er gert í ungliðastarfi flokkanna í Eyjum að byggja frekar upp eigin ungliðahreyfingu. Eyverjar standa sig með prýði, þetta eru kraftmiklir einstaklingar sem þarna eru á ferð. Þeir gera allt stjórnmálavafstrið í Eyjum mun skemmtilegra. 

Eyverjar eru kröftugt félag sem starfar á ársgrundvelli en ekki bara fyrir kosningar. Þarna gefst ungu fólki tækifæri á að hittast, spjalla saman og taka þátt í mótun á stefnu flokksins. Það er ekkert nema gott um það að segja og væri óskandi að aðrar pólitískar hreyfingar í Eyjum hefðu á að skipa svona virkum ungliðadeildum.

Ef þið viljið stofna þannig deild gerið það þá á eigin verðleikum en ekki með því að reyna að gera vafasöm góð verk annarra. Öfund verður aldrei jarðvegur uppbyggilegs starfs og þeir sem eldri eru ættu ekki að innleiða þannig þankagang hjá æskunni.

Óska þér alls hins besta í stofnun ungliðahreyfingar í Eyjum.

Kv. Jarl.

[Georg Eiður Arnarson, 28.3.2010 kl. 09:48]

Sæll Jarl ,túlkun þín á mínum skrifum er ansi oft þannig að ekki er vafi á því að þú ert afar pólitískur , ég skil það hinsvegar vel enda ert þú eins og allt þetta ágæta unga fólk í Eyverjum svo sannarlega á spenanum hjá íhaldinu . Gangi þér allt í haginn vinur . kv .

[Jarl Sigurgeirsson, 28.3.2010 kl. 13:04]

Endilega skýrðu þetta betur út fyrir mér Georg. Ég átta mig ekki alveg á því hvaða spena ég er að totta og þá hvað kemur yfirleitt úr þeim spena. Finnst þessar aðdróttanir þínar um að fólk hér í bænum geti ekki fengið vinnu á eigin verðleikum stundum vera ansi rætnar. Ég trúi því í það minnsta að ég sé í minni vinnu á eigin verðleikum.