Frjálslyndir í Suðurkjördæmi

Viðtal við frambjóðendur Frjálslynda flokksins Í Suðurkjördæmi  Í síðasta tölublaði Frétta birtist viðtal við tvo af frambjóðendum frjálslyndra í Suðurkjördæmi, þau  Hönnu Birnu Jóhannsdóttur  í 3. sæti og Óskar Þór Karlsson í 2. sæti. Þetta er skemmtilegt viðtal við þau, þar sem þau fara yfir landsmálin og brennandi málefni líðandi stundar. Viðtalið er birt hér óstytt. Ósanngjörn gagnrýni á Frjálslynda  flokkinn Fréttir: En nú hafið þið í  Frjálslynda flokknum fengið á ykkur harða gagnrýni fyrirmálflutning ykkar  í málefnum innflytjenda. Hann hefur ekki fallið í góðan jarðveg. Óskar Þór: Nei en það er mjög ósanngjörn og ómálefnaleg gagnrýni og hefur raunar  gengið út fyrir öll mörk. Tillögur okkar ganga út á það  að við höfum stjórn á straumi innflytjenda. Hann sé ekki meiri en vinnumarkaður okkar og velferðarkerfi þolir. Við þurfum líka  að geta tekið  vel á móti fólki  og fylgst með að ekki sé brotinn á því réttur. Og við viljum að þeir sem kjósa að setjast hér að til langframa fái góðan stuðning til aðlögunar að íslensku samfélagi, m.a. með ókeypis íslenskukennslu. Þessi mál hafa einfaldlega verið í ólestri.  Frjálslyndi flokkurinn hefur  mótað góðar og hófsamar tillögur,sem hafa það að leiðarljósi að koma í veg fyrir fordóma og önnur samfélagsleg vandamál. Aðrir flokkar hafa engar slíkar  tillögur mótað. Þess í stað er ráðist að Frjálslynda flokknum með miklum fordómum í okkar garð. Þessi heiftúðlegu viðbrögð eru okkur algjörlega  óskiljanleg  Þessi viðbrögð sanna líklega best hve mikil hætta er raunverulega hér á ferðum. Þannig höfum við  félagar í Frjálslynda flokknum  sjálf verið að upplifa það  hvað  það  er grunnt á fordómum og  hatursfullum viðbrögðum  í garð samborgaranna,  eins og þessi viðbrögð frá pólitískum andstæðingum okkar sína.   Breytt sjávarútvegsstefna, mikilvægasta hagsmunamál   sjávarbyggðanna. Fréttir: Snúum okkur þá að öðrum  kosningamálum. Þið eruð enn  meðsjávarútvegsmálin á dagsskrá, hvað viljið þið gera í þeim? Óskar Þór : Það mikilvægasta er að  finna leið til þess að komast út úr því kerfi, sem nú ríkir um framsal  og leigu veiðiheimilda, sem leitt hefur  atvinnugreinina í ógöngur. Fréttir: Hvað áttu við með því ? Óskar Þór :Verðið á kvótanum hefur stöðugt hækkað og  nú er  svo komið að  eitt tonn af kvóta í  þorski kostar 3 milljónir króna og leigan er  200 krónur kílóið. Þetta hefur leitt til  gríðalegrar skuldasöfnunar í útgerðinni og þrátt fyrir  miklar tækniframfarir og metverð á afurðum þá eru gjaldeyristekjur þjóðarbúsins af sjávarútvegi við sögulegt lámark. Og skuldasöfnunin mun fyrirsjáanlega halda áfram.  Þetta kalla ég ógöngur.   Ekki eðlileg markaðsverðmyndun á kvóta Fréttir: Já en  á þessi verðmyndun sér ekki stað á frjálsum markaði, er nokkuð viðþessu að gera ? Óskar Þór:  Nei  þetta getur engan vegin talist frjáls markaður.Við í Frjálslynda flokknum erum ekki sammála því.  Þessi verðmyndun er í höndum fámenns hóps útgerðarmanna, sem hafa  vitaskuld fullt samráð  sín á milli um að stýra verðinu stöðugt upp. Þeir hafa  þetta allt í hendi sér. Þetta himinháa verð á kvótanum veldur því að  það er aðeins á færi stærstu útgerðanna að kaupa  og þangað safnast kvótinn. Þeir fáu einyrkjar sem eftir eru í útgerð, freistast til þess að selja sig út úr atvinnugreininni og maður getur alveg skilið það.   Þetta er það sem eigendur og forsvarsmenn stærstu fyrirtækjanna vilja, því þá standa á endanum  sárafá fyrirtæki  eftir ,sem ráða  yfir öllu, veiðunum, fiskvinnslunni og markaðnum erlendis.  Þeir hefðu þá ekki  neina samkeppni frá öðrum íslenskum framleiðendum og  þyrftu því ekkert  að vera að undirbjóða þá lengur, til þess að ná af þeim viðskiptum, eins og  gerist nú.  En  ég vil taka það skýrt fram að við  erum  ekkert  sérstaklega að beina gagnrýni   okkar að útgerðarfyrirtækjunum og forsvarmönnum þeirra. Þeir aðilar er auðvitað að gera það sem þeir telja best þjóna hagsmunum  þeirra fyrirtækja og “bisness” heimurinn er harður heimur.  Allur þunginn í gagnrýni okkar beinist að núverandi ríkisstjórn og stjórnarherrum hennar. Það er það fólk, sem algjörlega  hefur brugðist þeim samfélagslegu skyldum sínum að skapa réttlátar og almennar leikreglur sem þjóna almannahagsmunum. Þess í stað hafa þeir skapað löggjöf sem mismunar þegnunum gróflega , færir sumum aðilum forréttindi og auð  en mismuna öðrum og þá er voðinn vís. Þessi þróun í verðmyndun á kvótanum er  því afleiðing af pólitískum mistökum.   Tryggja þarf þjóðareign á fiskimiðunum, með nýrri löggjöf, ekki aðeins í orði. Fréttir: En hvernig ætli þið að bregðast við, á að taka kvótann af fyrirtækjunum ? Óskar Þór:  Nei. Í okkar tillögum er lagt til að sett verði  ný löggjöf um sölu og leigu á aflaheimildum, sem um leið tryggi þjóðareign á fiskimiðunum og nýtingu þeirra. Það er þjóðarnauðsyn að  stíga slíkt skref nú og það verður ekki gert með einhverju  “þó ekki”  ákvæði í stjórnarskrá. Samkvæmt tillögum Frjálslynda flokksins þá færi  leiga og sala aflaheimilda aðeins fram  um einn opinberan viðskiptamarkað og við sölu verði aflahlutdeildin skilgreind sem afnotaréttur, sem gildi í takmarkaðan tíma gegn gjaldi ,sem renni til ríkis og sveitarfélaga. Og við erum ekki að tala um að taka kvóta af fyrirtækjunum. Aflaheimildir, sem nú eru á skipum yrðu það áfram,  en það verður aðeins mögulegt að nýta þær til fiskveiða,  á þeim skipum sem þær eru vistaðar á ,svo lengi sem eigandinn eða eigendahópurinn er óbreyttur. Um leið  og eigendaskipti eiga sér stað, verða aflaheimildirnar tímabundin afnotaréttur og sæta   gjaldtöku, eftir atvikum  að hluta eða öllu leiti,  samkvæmt sömu reglum og verðlagningu og  gildir  á opinbera markaðnum á hverjum tíma. Fréttir: Gerurðu útskýrt þessar hugmyndir betur  með dæmum. Óskar Þór  :Ef við tökum einföld dæmi til skýringar, þá virkar þetta þannig að við sölu á skipi til annars aðila þá  breytist kvótinn í tímabundinn nytjarétt og aflaheimildir skipsins verða  allar gjaldskyldar í samræmi við það sem  gildir á opinbera markaðnum. Kaupi einhver t.d. 10% hlut í útgerðarfyrirtæki þá  gildir það sama að 10 % af kvótanum breytist þá í tímabundin nytjarétt t.d.  til 5- 10 ára og verður gjaldskyldur  á sama hátt. Það verður þó ekki mögulegt að breyta félögum í sjálfseignafélög. Niðurstaðan er því sú að núverandi útgerðarfyrirtæki  greiða ekkert umfram það sem þau nú  þegar gera á meðan eignarhald er óbreytt. Þau hafa því áfram heilmikið forskot umfram aðra, þótt það á endanum hverfi, því fólk getur  ekki erft þennan rétt. Það verður því ekki lengur  mögulegt að fénýta kvóta í þeim stórkostlega mæli, sem nú er gert , og er  bersýnilega til skaða fyrir atvinnugreinina. Kvótinn, sem nú er vistaður á skipi verður því ekki nýttur til annars en fiskveiða á viðkomandi skipi.   Styrkir stöðu sjávarbyggðanna. Hanna Birna : Þessi breyting  yrði  til góðs fyrir Vestmannaeyjar.  Hún myndi skapa festu í sjávarútvegsfyrirtækin,  þannig að það er miklu minni hætta  á því að fyrirtæki eins og  t.d. Vinnslustöðin yrði seld í burtu með öllum kvótanum einn góðan veðurdag eins og  bæjarbúar óttast nú. Núverandi ástand skapar óþolandi óvissu. Óskar Þór : Og á þennan hátt  getum við smám saman brotist út úr núverandi eignarhaldskerfi og  tryggt raunverulega  þjóðareign á fiskimiðunum, ekki aðeins í orði heldur einnig á borði.  Þessar tillögur yrðu útgerðarmönnum framtíðarinnar til góðs.  Verðmyndun á kvótanum yrði á opinberum markaði og  fiskveiðarnar  yrðu arðsamari fyrir samfélagið  en þær eru nú.  Á því leikur enginn vafi í okkar huga. Þessum tillögum hefur að sjálfsögðu ekki verið lýst út í hörgul hér, en við sjáum  engin veruleg  vandkvæði á að hrinda þeim í framkvæmd.   Aflaheimildir gætu að lokum horfið úr landi. Ef  núverandi kerfi yrði  hinsvegar óbreytt  yrði atvinnugreinin algjörlega lokuð fyrir nýliðun, einyrkjarnir hyrfu en stóru fyrirtækin öðluðust  beinan eignarétt yfir aflaheimildum og þau gætu að lokum horfið úr landi með kvótann  í stórum stíl. Að óbreyttu  er líklegt að þannig færi og hver kærir sig um það ? Síðan erum við með margar aðrar mikilvægar tillögur í sjávarútvegsstefnu okkar.s. s  markvissari veiðistjórnun með svæðaskiptingu, við viljum opna  kerfið fyrir handfæraveiðar, fækka tegundum í kvóta, aðskilja veiðar og vinnslu  og tryggja sanngjarna samkeppni í fiskvinnslunni þar  sem reglan  sé sú að  fiskur seljist til  hæstbjóðenda. Ef þessar tillögur Frjálslynda flokksins yrðu að veruleika, þá ykist arðsemi atvinnugreinarinnar fyrir samfélagið. Og til lengri tíma litið, þá teljum við þær skapa  grundvöll til sátta um þessi mál. Frítekjumark í 1800 þúsund krónur. Fréttir: Hvaða önnur mál er Frjálslyndi flokkurinn  með sem kosningamál ? Hanna Birna : Við leggjum mikla áherslu á velferðarmálin og sanngjarnar breytingar í skattkerfinu. Við viljum rjúfa þær fátæktargildrur, sem eru til staðar í kerfinu nú og núverandi ríkisstjórn ber ábyrgð á. Við viljum hækka  persónuafslátt fyrir lágtekjufólk  upp í 150 þúsund krónur á mánuði, þannig að frítekjumark  yrði 1800 þúsund kr á ári. Úr því lækki  persónuafslátturinn hlutfallslega,  þannig að á tekjur yfir 3 milljónum króna  verði hann  112 þúsund á mánuði.   Við viljum  að bótaþegar, eins og aldraðir og öryrkjar  hafi frítekjumark þannig að þeir geti aflað sér tekna, allt að eina milljón á ári án þess að bætur skerðist . Einnig viljum við rjúfa tekjutengingu   bótaþega  frá tekjum maka hans. Þá viljum við skattleggja lífeyristekjur sem fjármagnstekjur og að bætur almannatrygginga fylgi launavísitölu. Fréttir: En eru þessar breytingar raunhæfar ,vitið þið hvað þær kosta rikissjóð ? Óskar Þór:  Kristinn H. Gunnarsson alþingismaður ,sem er stærðfræðingur og þekkir þessi mál mjög vel hefur reiknað út að þetta kosti ríkissjóð rúml. 20 milljarða króna á ári. Sumt í þessum tillögum kosta  ríkissjóð lítið eða jafnvel ekkert ,eins og að fara með frítekjumarkið í eina milljón, sem er í rauninni sjálfsagt mannréttindamál. Og síðan má líka á móti  spara meira í ríkisrekstrinum ,eins og t.d. utanríkisþjónustunni.  Það að eyða jafnvel heilum milljarði króna í  að reyna að fá sæti í Öryggisráði Sameinuðu þjóðanna er dæmi um óþarfa peningabruðl.  Þeim fjármunum væri betur varið t.d. í að bæta  úr skorti á hjúkrunarplássum fyrir aldraða.   Gera þarf átak til bættrar þjónustu við aldraða Hanna Birna :  Í þjónustu við aldraða þarf að gera stórátak og ekkert minna og það mun Frjálslyndi flokkurinn gera . Það þarf að marka  heildarstefnu í samvinnu við hagsmunasamtök aldraðara.  Það er brýnt að hraða uppbyggingu hjúkrunarrýma á næstu árum og eyða þannig biðlistum ,sem eru hneisa.  Það þarf líka að eyða fjölbýlum á öldrunarstofnunum og skipuleggja þar aðbúnað  þannig að hann sé heimilislegur og fólki  geti liðið vel á ævikvöldi sínu. Efla verður heimahjúkrun. Við teljum  að þjónusta við aldraða eigi að færast til sveitarfélaganna, þar sé hún best komin í nálægð við þá sem  þurfa að njóta hennar. Og til þess þarf auðvitað að endurskoða tekjuskiptingu ríkis og sveitarfélaga.   Hraðskreiðari og stærri Herjólf strax og fargjöld leiðrétt. Hanna Birna:  Frjálslyndi flokkurinn mun gera stórátak í samgöngumálum um land allt. Samgöngumál eru að sjálfsögðu mikilvægt atvinnumál og fyrir okkur hér í Vestmannaeyjum  skipta greiðar samgöngur við land  miklu máli og leiðrétta þarf þann kostnað sem lagður er á þjóðveg okkar. Það er auðvitað sjálfsagt mál að klára alla rannsóknir varðandi möguleika á  að gera jarðgöng  milli lands og eyja. Það gera sér samt flestir  grein fyrir að slíkt mannvirki verður ekki til á næstu árum. Höfn í Bakkafjöru er framkvæmd sem margir hafa miklar efasemdir um, ekki síst sjómenn sem óhætt er að taka mark á. Það þarf  að athuga vandlega og  þótt ráðist yrði í slíka hafnargerð er það nokkuð sem varla verður að veruleika á næsta ári. Mér finnst  reyndar að yfirlýsingar samgönguráðherra um fjármagn í slíka höfn  beri keim af að vera kosningaloforð sem  við Vestmannaeyingar höfum ekki fast í hendi. Niðurstaðan er að okkar áliti sú, að  hvað sem síðar kann að verða  þá vantar okkur  stærri og hraðskreiðari Herjólf  STRAX  Fyrir því munum við berjast.   Afnám verðtryggingar á lánsfé stuðlar að betri hagstjórn Óskar Þór : Eitt mikilvægt mál sem Frjálslyndi flokkurinn vill sérstaklega beita sér fyrir er afnám verðtryggingar á lánsfé.  Við gerum okkur grein fyrir að það er vandasamt skref að stíga en mjög nauðsynlegt að okkar mati.  Það er óþolandi fyrir fólk að sjá lán  sín hækka og hækka árum saman  þótt skilvíslega sé greitt af þeim mánaðarlega. Þá   ættu allir að sjá  að  þetta tvöfalda kerfi á krónunni  hefur  reynst illa og haft skaðleg áhrif á hagkerfið.  Þetta hefur valdið miklum lausatökum og agaleysi í hagstjórninni. Ég tel t.d. ólíklegt að bankarnir hefðu  ruðst inn á íbúðalánamakaðinn með eins miklum  krafti eins og þeir gerðu ef  þeir hefðu ekki þessa  verðtyggingu á krónunni.  Og vaxtahækkanir Seðlabankans virðast lítið bíta, aðeins styrkja gengi krónunnar upp úr öllu valdi, sem hlýtur að hefna sín fyrr en síðar.  Útkoman er því efnahagsleg óstjórn og mikill óstöðugleiki sem ríkisstjórnin ber að sjálfsögðu fulla ábyrgð á.   Það þarf að fella núverandi ríkisstjórn Fréttir: Hvaða afstöðu hafið þið í Frjálslyndaflokknum til stjórnarmyndunar. Meðhverjum viljið þið vinna?  Það er höfuðverkefnið að fella  núverandi ríkisstjórn. Síðan viljum við  taka þátt í myndun  nýrrar ríkisstjórnar  og vinna þannig  að því að okkar góðu  stefnumál fái brautargengi. Enn allur árangur okkar  byggist á kosningaúrslitunum 12 maí Við hvetjum því kjósendur í Vestmannaeyjum til þess að kynna sér stefnu  Frjálslynda flokksins og vinna með okkur og stuðla þannig að þeim  breytingum, sem nauðsynlegt er að hrinda í framkvæmd. Til baka yfirlit frétta

Heimaklettur Vestmannabraut 62 Box 386 900 Vestmannaeyjar Símar:  869-3799 og             698-1957 Netföng: [e-mail] og [e-mail] Fréttir 30. apríl 2007 Íslandshreyfingin - nýtt framboð? 28. apríl 2007 Það er ekki hægt að úrelda sjávarútveginn vegna skulda 27. apríl 2007 Viðtal við frambjóðendur Frjálslynda flokksins Í Suðurkjördæmi 24. apríl 2007 Auglýsing um sjávarútvegsmál Pistlar og greinar 21. apríl 2006 Pistlar og greinar Pólitískt Tyrkjarán