Þarna ræður stórútgerðinn

7. maí 2007 :

Sjávarútvegsráðherra hafnar beiðni Reykjaness um áframhaldandi lokun viðkvæmrar hrygningarslóðar við Reykjanes

Í bréfi sjávarútvegsráðuneytisins dagsett 3. maí sl. til Halldórs Ármannssonar formanns Reykjaness segir eftirfarandi:

„Vísað er til bréfs yðar frá 30. apríl 2007 þar sem þér fyrir hönd Smábátafélags Reykjaness óskið eftir að gildistíma reglugerðar nr 888, 11. október 2002 um sérstök línu og netasvæði, verði framlengt.
Ráðuneytið tilkynnir að það mun ekki framlengja banni við veiðum með botnvörpu á svæði því sem tilgreint er í fyrrgreindri reglugerð.“

Halldór sagði þetta vera mikil vonbrigði, en þó ánægjulegt að loksins eftir áralanga baráttu hefði fengist svar frá ráðuneytinu. Það innihéldi einfaldlega að ráðherra væri andvígur því að friða viðkvæm hrygningarsvæði fyrir trollinu.

Eins og bent var á í bréfi Reykjaness fylltist allt af togurum á svæðinu á miðnætti 1. maí. „Þeir hafa trollað svæðið þvers og kruss frá þeim tíma og heimabátar í tugatali sem nýtt hefðu svæðið með línu fyrir þessa holskeflu nú flestir flúnir af því. Ég reikna með að búið verði að ganga frá þessu nú í vikunni ef Fiskistofa lokar ekki á smáýsu sem þarna er mikið af“, sagði Halldór.