Samgöngumál og róður á Blíðu

Var að koma í land áðan, eftir að hafa verið á sjó í 18 tíma. Afli var ágætur, rúm tvö tonn á 14 bala. Veðrið í nótt var mjög erfitt, mikill sjór og gekk á með éljum, en sem betur fer lægði þegar leið á morguninn.

Í gær átti ég ágætt samtal við Jón Bernódusson og lagði fyrir hann nokkrar spurningar. Fyrsta spurningin var í sambandi við grein hans í bæjarblöðunum, þar sem segir: Aðeins hefði orðið fjórir dagar ófærir, það sem af er þessu ári. Fórum við aðeins yfir tölurnar sem birtast í grein hans og þar á meðal þar sem stendur, samtals komnar 44 frátafir á árinu. Var hann sammála mér um það að, að sjálfsögðu væru 44 frátafir samtals 11 heilir dagar. Hann sagði mér hinsvegar, að í raun og veru væri nánast hægt að birta hvaða tölu sem er í dag, það er aðeins reynslan, sem getur sýnt okkur, hvernig þetta verður. Vildi hann reyndar meina, að viðmiðið væri of lágt og vonandi er það rétt hjá honum.

Nokkur atriði í spjalli okkar vöktu sérstaklega athygli mína, og þá sérstaklega hugmyndir hans um stærð Bakkafjöru ferjunnar. Hann hefur miklar áhyggjur af því, að útboð, þar sem sá sem býður á að eiga og reka ferjuna, því sannleikurinn er sá, sagði hann, að miðað við þær rannsóknir sem við höfum unnið hjá Siglingamálastofnun, þá er alveg ljóst að ef mönnum dettur til hugar að koma með styttra skip en 67 metra, þá væri mun betri kostur fyrir eyjamenn að láta þetta eiga sig. Marg endurtók hann þetta atriði í spjalli okkar.

Einnig lýsti hann yfir áhyggjum sínum varðandi uppgræðsluna á Bakkafjöru og hafði greinilega áhyggjur af því, að það yrði kannski of erfitt að græða upp, enda alinn upp við að horfa á rokið þarna frá eyjum séð og lýsti hann þeirri skoðun sinni, að ef ekki tækist að hefta verulega sandfokið þarna, þá væru miklar líkur til þess, að þetta verkefni yrði misheppnað.

Næst spurði ég hann út í áhættumatið og þá hvernig það liti út, ef mið væri tekið af því hvert við erum flest að fara og vegirnir teknir inn í matið. Kom hann mér enn á óvart með því að segja, að ef vegirnir eru inni í áhættumatinu, miðað við að fara á höfuðborgarsvæðið, þá er það sennilega 100 - 200 sinnum hættulegra, heldur en að fara með Herjólfi.

Eitt atriði í viðbót spurði ég hann sérstaklega. Fyrir viku síðan voru austan 35 metrar á Stórhöfða, en Bakkafjöru duflið sýndi fært. Sagði hann það rétt að hann þekkti nú til þess að það hvesti stundum í eyjum og var hann sammála mér í því, að þó að duflið sýni fært, þá eru fjölmargar ástæður sem geta orðið til þess, að það verði ófært og ítrekaði hann enn og aftur, að ef skipið verður styttra en 67 metrar, þá er þetta klúður.

Tvö atriði var ég ekki sammála honum um og ég spurði hann út í setninguna í lokaskýrslu Gísla Viggóssonar, þar sem segir, það er ríkjandi skjól við Bakkafjöru í öllum vindáttum vegna nálægðar við Vestmannaeyjar. Skýrði hann þetta atriði þannig, við ætlum að reyna að hanna og byggja höfnina þannig að það verði skjól í Bakkafjöruhöfn í öllum vindáttum. Ég ætla nú að leyfa mér að efast um að það takist.

Hitt atriðið var í sambandi við sandburð inn höfnina. Sagði hann það atriði líka muna leysast að miklu leyti vegna hönnunar og byggingar á höfninni, og lýsti hann þeirri skoðun sinni, að sandburðurinn væri fyrst og fremst vegna strauma. Ekki er ég sammála þessu, enda höfum við eyjamenn horft upp á meira að segja grjóthnullunga og jafnvel fisk kastast upp á eyðið, þegar mesta brimið er.

Eitt atriði enn spurði ég hann að, að lokum og það er hversvegna þessi grein hans hefði lent í báðum bæjarblöðunum í Vestmannaeyjum. Sagði hann mér það að bæjarstjórinn  í Vestmannaeyjum hefði fengið þessar töflur frá sér og svo sem ekkert óeðlilegt við það.

Báðir vorum við nokkuð ánægðir með spjallið, vonandi verður þetta til að útskýra málið betur fyrir fólki og það sem ég tek helst út úr þessu samtali, eru fyrst og fremst áhyggjur þeirra sem standa á bak við rannsóknir og hönnun á höfninni, að jafnvel nú þegar sé búið að klúðra þessu máli, með því að gera ráð fyrir of litlu skipi og hitt svo að þó að duflið sýni, þegar ófært er inn Bakkafjöruhöfnina, að þá er líka jafn ófært þegar veður eru vond og ófært er í aðrar hafnir, þó duflið segi annað. Meira seinna.

Athugasemdir

[Hallgrímur Guðmundsson, 9.11.2007 kl. 22:02]

Ef ég man rétt Goggi þá flaug bæði Karfi og Langa upp á tún út á Breiðabakka í einni SV brælunni, þetta var í kringum 1990 - 1992 man ekki nákvæmlega árið. Þetta segir sitt um sjólagið sem getur orðið við suðurströndina. Annað sem er athyglisvert, ef menn segjast geta reiknað nákvæmlega út hvernig sandburðurinn verður af hverju leysa menn þá ekki vandann sem kom upp við innsiglinguna á Hornafirði? Ég geri fastlega ráð fyrir því að það hafi verið reiknað út á sínum tíma með mikilli nákvæmni.

[Jóhann Elíasson, 9.11.2007 kl. 22:47]

Samkvæmt þessu samtali, þá blunda efasemdir um þessa framkvæmd hjá Jóni, skyldi þetta eiga við fleiri sem hafa lýst yfir stuðningi við framkvæmdirnar en hafa ekki viljað tjá sig vegna "pólitískra" tengsla?

[Georg Eiður Arnarson, 10.11.2007 kl. 07:11]

Sæll Hallgrímur, já ég man eftir þessu og líka þegar Eiðið skemmdist og bæði grjót og litli karfi voru þar út um allt.  Sæll Jóhann , það kæmi mér ekki á óvart þótt þú hefðir hitt naglann á höfuðið, en það er aðeins með kosningu sem við getum fengið sannleikan upp á yfirborðið. kv.