Fundur með samgönguráðherra

Nokkur atriði sem komu fram á fundinum.

Samgönguráðherra upplýsti okkur um m.a. að samkvæmt áætlun á að setja 110 milljarða í samgöngumál á öllu landinu og þar af er heildarkostnaður áætlaður vegna Bakkafjöru 5,6 milljarðar. Varðandi þetta atriði, þá var það tekið fram af öðrum þingmönnum á fundinum og einnig á fundi sem ég sat með meirihlutanum í bæjarstjórn Vestmannaeyja s.l. fimmtudag, að almennt gerðu menn sér grein fyrir því að að öllum líkindum muni þetta kosta töluvert meira og telja menn sig hafa vilyrði fyrir frekari fjármagni í þetta og að málið verði einfaldlega klárað.

Fleiri atriði komu fram hjá ráðherra. Varðandi göng, þá yrðu þau aldrei ódýrari en 55 milljarðar og gætu kostað allt að 82 milljörðum.

Varðandi Bakkafjöru, þá er stefnt að því að siglingar hefjist sumarið 2010, skipið verði 62 m. langt og 15 m. breitt, búið tveimur vélum og ganghraðinn verði lágmark 15 sjómílur. Ferjan taki 250-300 manns og 50 fólksbíla (gert er ráð fyrir 100 svokölluðum flugvélarsætum). Gert er ráð fyrir 1900 ferðum á ári, eða 5 ferðum á dag að jafnaði, eftir árstíðum.

Verðskrá. Reiknað er með því að það muni kosta 1000 kr. fyrir bíl, 500 kr. fyrir fullorðna og 250 fyrir öryrkja. Ekki kom fram hvað komi til með að kosta með rútu frá Bakka í bæinn, en einungis er gert ráð fyrir 2-3 ferðum á dag.

Útboð vegna smíði á ferjunni fari fram í apríl á þessu ári.

Ágætis umræður áttu sér stað á fundinum eftir að þingmenn höfðu lokið sínum ræðum. Kom þar m.a. fram í svari ráðherra að hann treysti sérfræðingum siglingamálastofnunar og varðandi göng, að best væri að slá þau af í bili til þess að þurfa ekki að bíða lengur með að hefjast handa.

Björgvin G. var minntur á kosningaloforð um að rannsóknir varðandi göng yrðu kláraðar og svaraði hann því til, að þó að þær yrðu ekki kláraðar núna, þá yrðu þær kláraðar seinna.

Einnig var spurt um einhverjar aðgerðir strax og var svarið við því: Ekkert.

Einnig var spurt um skipalyftu og stórskipahöfn, var því svarað til að varðandi Skipalyftuna, þá væri vandamálið (ef ég skildi það rétt) tengt ESB, en að öðru leiti væri það mál í farvegi.

Páll Scheving spurði um frátafir og var með töflu siglingamálastofnunnar fyrir síðasta ár og kom þar fram að á 33 dögum hefðu orðið einhverjar frátafir og þar af 8 heilir dagar, en að sjálfsögðu miðast þetta bara við duflið og inni í þessum tölum er ekki ófærðir vegna venjulegrar brælu og ófærðar. Almennt heyrðist mér menn vera sammála um það sem ég hef lengi haldið fram, að frátafir verði mun fleiri með Bakkafjöru en Herjólfi, en menn gera sér vonir um það að með því að ferðirnar verði þetta margar og siglingaleiðin þetta stutt, þá nái menn að vinna þetta upp með fleiri ferðum. Ég er sammála þessu og vona það svo sannarlega að þetta gangi eftir.

Einnig var spurt um lagfæringar og viðhald á núverandi Herjólfi og var eitthvað lítið um svör við því.

Einnig kom fram að NMT-kerfið yrði lagt niður um næstu áramót, þannig að þá þurfa allir trillu og jeppakarlar að fjárfesta í nýjum símum.

Samgönguráðherra, Kristján Möller kom vel fyrir á fundinum, svaraði þeim fyrirspurnum sem hann fékk og sló um sig með bröndurum þess á milli og þótt að margir væru honum ósammála og ég hafi sjálfur ýmsar efasemdir um þessa Bakkafjöru leið, þá þakka ég fyrir mig.

p/s Ég var skammaður í gær fyrir að bera ekki upp spurningar og þær athugasemdir sem ég hef varðandi þetta Bakkafjöru dæmi við ráðherra. Svar mitt við því er einfalt: Mér finnst einfaldlega bara mjög þægilegt og gott að geta farið yfir málið í ró og næði fyrir framan tölvuna og orðað þar mínar skoðanir og hugsanir, en fyrst og fremst vona ég það, að þeir fjölmörgu sem gera sér vonir um að líf okkar hér í eyjum batni með þessu, verði að veruleika.

Meira seinna.

Athugasemdir

[Guðrún Jóna Gunnarsdóttir, 15.1.2008 kl. 20:27]

Menn eiga líka að hafa sinn háttinn á í þessum efnum og tjá sig með þeim hætti sem hentar þeim. Sumir telja að mótmæli felist í framíkalli, skömmum og þrumuræðum. Sumum hentar sú aðferð ágætlega en aðrir fara aðrar leiðir sem eru ekki síður áhrifaríkar.

Hér er ágæt samtantekt um það helsta sem kom fram á fundinum. Ég er sammála þér í því Georg, að þessi ákvörðun var tekin fyrir löngu síðan. Etv. þurfti einhvern tíma til að fá ráðherra Samfylkingarinnar til að slá í takt við Sjálfstæðismenn. Kannski ekki auðvelt fyrir suma að fara gjörsamlega gegn eigin sannfæringu og yfirlýsingum en áætkunin hefur tekist; ríkisstjórnarflokkarnir slá í takt. Hver hefði trúað því fyrir 2-3 árum að þessir tveir flokkar næðu saman

[Georg Eiður Arnarson, 15.1.2008 kl. 22:25]

Takk fyrir þetta Guðrún. kv.

[Níels A. Ársælsson., 18.1.2008 kl. 13:52]

Ég hef trú á Bakkafjöru þó svo eitthverjar frátafir verði af og til. Það er rétt eins og þú bendir á að fjölgun ferða mun bæta þetta upp, að ég nú ekki tali um stytting siglingaleiðar sem hlýtur að vera aðal mál málanna.

[Hildur Sif (IP-tala skráð) 18.1.2008 kl. 15:08]

Miðað við greinina í fréttum þá á að báturinn að vera 60-70 metrar, munar það ekki öllu ef hann er t.d. 70? Hvað þýðir tveggja öldu skip? Er ekki mögulegt að láta bátinn ganga til Þorlákshafnar þegar ekki er hægt að sigla inn í Bakkafjöru?

[Georg Eiður Arnarson, 18.1.2008 kl. 20:15]

Sæl Hildur , á fundinum á Sunnudag var dreift bækling þar sem stendur meðal annars: Nýr Herjólfur skal vera 62 metrar og 15 metra breiður. Varðandi tveggja öldu skip , þá getur þú lesið færslu frá mér síðan 25, 11 . Og með þetta síðasta frá þér, núverandi Herjólfur lætur oft illa í brælu en hann er þó 70 metrar. Bakka Herjólfur er hinsvegar bæði styttri og á að rista grynnra , svo það segir sig sjálft , mun verra sjóskip því miður . kv.

[Hildur Sif (IP-tala skráð) 18.1.2008 kl. 23:59]

Sæll aftur,

Ég sé í færslunni hvað einnar öldu skip en hvað er þá tveggja öldu? Ég átta mig ekki alveg á því hvort er rétt að, að ákveðið sé að skipið verði 62 metrar eða að það verði á milli 60-70 metra. Er þetta kannski ekki ákveðið ennþá? Verst að ekki verður hægt að sigla á dallinum til Þorlákshafnar því það væri ágætt að hafa ,,backup" plan þegar illa veðrar

Hildur

[Georg Eiður Arnarson, 19.1.2008 kl. 11:04]

Sæl Hildur,

samkvæmt bæklingi frá Samgönguráðuneytinu er gert ráð fyrir því að ferjan verði 62 metrar, þrátt fyrir að samkv. mælingum starfsmanna Siglingamálastofnunnar verði skipið að vera lágmark 67 metrar, til þess að geta siglt að mestu leyti ofan á öldunum, í staðinn fyrir að vera of stutt og lenda þá á milli aldanna, sem þýðir að þá lætur það miklu verri í sjó.

Tveggja öldu skip á siglingarleiðinni Vestmannaeyjar-Þorlákshöfn yrði sennilega að vera upp undir 100 m. skip, vegna þess að lengdin á milli aldanna og meiri ölduhæð er þar heldur en í Bakka.  kv.