Er Hafró trúverðug?

Fyrir mitt leyti, þá langar mig að reyna að svara spurningunni sem ég set sem fyrirsögn hér, enda standa öll spjót á Hafró núna vegna ákvörðunar þeirra um að stoppa loðnuveiðar.

Fyrir nokkrum árum síðan fóru sjómenn að kvarta mikinn yfir mikilli ýsugengd á miðunum. Margir höfðu samband við Hafró, sem sagðist ekki sjá ástæðu til að auka kvótann í þeirri tegund (ef ég man rétt, þá var ýsukvótinn einhverstaðar nálægt 40 þús tonnum, í dag er hann 105 þús. tonn) þetta endaði með því, að þáverandi sjávarútvegsráðherra tók fram fyrir hendurnar á Hafró og bætti við kvótann og viti menn, þá var eins og Hafró rumskaði af værum blundi, og næstu 3-4 ár á eftir juku þeir ýsukvótann á hverju ári.

Og hver man ekki eftir því, þegar Hafró týndi 600 þús. tonnum af þorski? Og hver man ekki eftir því, þegar Davíð Oddsson, þáverandi forsætisráðherra jók aflaheimildir í þorski um 30 þús. tonn, án þess að Hafró segði nokkuð. Og hvernig var svo með kvótasetningu á keilu og löngu, sem meðal annars gerði það að verkum, að við eyjamenn máttum horfa á eftir mörgum skipum fara héðan og fjölda fólks missa vinnuna. Sjálfur hafði ég samband við Hafró vegna kvótasetningar og svo niðurskurðar ári síðar á keilu, þar sem ég óskaði eftir nánari útskýringum á hvaða rannsóknir lægju til grundvallar niðurskurðar á þeirri tegund. Svarið var alveg skýrt, menn fóru einfaldlega eftir veiðidagbókum hjá stórum línuveiðiskipum, fengu það út að keiluafli á hverja línuveiðieiningu hefði minkað og skáru niður samkvæmt því og ekkert var rannsakað. Svo lifa þessar tegundir, keila og langa, góðu lífi á helstu hrygningarstöðum þorsksins í kringum eyjar og hrygna svo, þegar þær hafa fitað sig vel á hrognum góðfiska.

S.l. vor var sennilega besta þorskveiðiár hjá okkur hér í eyjum í fjölmörg ár og það er engin furða, þó að mönnum hafi blöskrað þessi gríðarlegi niðurskurður í þorskveiði heimildum. Það sem mér þótti hinsvegar merkilegt eru útskýringar Hafró á þessum miklu þorskveiðum s.l. vor, sem gengu fyrst og fremst út á það, að vegna þess, hversu svangur þorskurinn væri, þá væri hann svo veiðanlegur. Ekki skal ég dæma um það, en það hefur hinsvegar vakið mikla athygli mína hversu ákveðnir starfsmenn Hafró eru í að stöðva loðnuveiðar á þessari vertíð, svo maður veltir því fyrir sér, hvort að Hafró sé kannski að vakna upp við þá staðreynd, sem að margir smábátasjómenn hafa bent á mörg undanfarin ár, að menn hafi hingað til verið að taka allt of mikið æti úr sjónum. Verði hinsvegar jafn mikið af þorski í vor eins og s.l. vor, þá er ljóst að enn einu sinni er Hafró að gera mistök.

Varðandi loðnuveiðar núna, þá finnst mér það ekki verjandi að sama dag og loðnuveiðar eru stöðvaðar, þá séu rannsóknarskipin send í helgarfrí. Það er alveg ljóst, bæði hér í eyjum og víða annarsstaðar á landinu, hefur verið fjárfest fyrir marga milljarða í bæði skipum og verksmiðjum, einnig hefur verið lögð mikil vinna í að skapa markaði erlendis fyrir loðnuna og maður talar nú ekki um allt það fjölmarga fólk, sem tekur lungann af sínum árstekjum á loðnuvertíð og ef við tökum mið af síðustu loðnuvertíð, þar sem loðnan var gengin fyrir Reykjanesið um þetta leytið á síðustu vertíð og auk þess fannst ný Vestfjarða ganga 15. mars á síðasta ári, sem varð til að loðnukvótinn var aukinn þá, þrátt fyrir að mörg skip væru þá þegar búin að snúa sér að öðrum veiðum. Sé þetta allt lagt saman, þá sé ég ekki eina einustu ástæðu fyrir Hafró að stöðva loðnuveiðar eins og nú hefur verið gert, en vonandi hefjast veiðar aftur í vikunni.

Ég byrjaði þessi skrif með einni spurningu og svar mitt er:"Nei, þetta eru ekki trúverðug vinnubrögð"

Meira seinna.

Athugasemdir

[Guðjón H Finnbogason, 25.2.2008 kl. 23:12]

Þetta kemur á hverri vertíð í upphafi,miðri og lokin helvítis Hafró þeir vita ekkert og hafa aldrei vitað neitt,svona saungur er alltaf,ár eftir ár.

[Jóhann Elíasson, 25.2.2008 kl. 23:43]

Er þetta bara ekki dæmigert fyrir vinnubrögðin hjá HAFRÓ?  Svo eru þeir í akkorði við að reyna að moka yfir eigin skít.

[Guðrún Jóna Gunnarsdóttir, 25.2.2008 kl. 23:59]

Sammála, frábær pistill hjá þér

[Guðrún María Óskarsdóttir., 26.2.2008 kl. 00:30]

Því miður finnst manni hálfgerð sýndarmennska vera á ferðinni í þessu efni Georg.

Hver ástæðan er skilur maður ekki.

kv.gmaria.

[þorvaldur Hermannsson, 26.2.2008 kl. 16:16]

Sæll Georg,Ef sjómenn feingu að ráða þá væri búið að veiða allt upp,Þeir eru eins og Híenur sem elta allt sem hreifist í sjónum.kv

[Sigurður Þórðarson, 26.2.2008 kl. 20:41]

Góður pistill Georg

[þorvaldur Hermannsson, 26.2.2008 kl. 22:46]

Sæl Hanna,Við getum deilt um kvótakervið.Það er líka silfurtært að það er veitt of mikið samanber Loðnuna.Ef þeim væri hleift á þetta núna þeir myndu veiða upp stofnin.kv