Frábær árangur hjá ÍBV og mikill lundi í eyjum

Óska ÍBV-strákunum til hamingju með sigurinn gegn Selfossi. Þetta Selfoss-lið olli mér töluverðum vonbrigðum og staða þess í deildinni ekki í nokkru samræmi við þennan leik, en okkar menn voru einfaldlega miklu betri á öllum sviðum og greinilegt, að þeir á Selfossi þurfa aðeins að taka til í vörninni hjá sér.

Í dag eru búnir 3 dagar af lundaveiðitímanum og byrjunin lofar góðu. Það var ekki mikill lundi við á fimmtudaginn, en ég ákvað samt að skreppa upp í Heimaklett, enda var vindáttin hárrétt þar og náði ég þar í 80 lunda. Fór síðan í gær vestur á Dalfjall í  norðvestan kalda og hreint ótrúlega miklu lundaflugi, en því miður þá snérist vindáttin yfir í vestan um hádegi, en ég náði samt í 230 lunda. Í morgun fór ég suður í Kervíkurfjall. Lítið var af lunda í byrjun, en vindáttin rétt, hinsvegar hvessti verulega um hádegi og eins og hendi væri veifað flykktist lundinn upp í fjöllin og var áberandi mikið af ung-lunda í dag. Veðrið varð hinsvegar fljótlega allt of hvasst þar sem ég var, en ég náði samt í 230 lunda, og er því samtals búinn að veiða 540 lunda eftir ca. 11-12 klukkutíma í veiðisæti.

Ég hafði svolítið gaman af því að koma í þennan veiðistað í morgun, því að í þessum veiðistað á ég mitt persónulega met, sem sett var 1998, eða 840 lunda á einum degi. Reyndar fór hálfur dagurinn í að bera allan lundann, enda er vegalengdin ca. 1,5 km frá sæti upp í bíl, en þennan sama dag 1998, var einmitt sett Vestmannaeyjamet í lundaveiði í Ystakletti, þar sem einn maður veiddi 1440 lunda, hann þurfti hinsvegar ekki að halda á einum einasta þeirra og munar þar ansi miklu.

Meira seinna.

Athugasemdir

[Guðrún Þóra Hjaltadóttir, 12.7.2008 kl. 22:43]

Georg, ég fæ vatn í munnin...Það verða margar steikur úr þessu.

[Guðrún María Óskarsdóttir., 12.7.2008 kl. 23:30]

Sæll Georg.

Glæsilegt til hamingju með veiðina í dag.

Maður er annars búin að vera úti í Eyjum með því að hlusta á Bylgjuna í dag.

kv.gmaria.

[Guðrún Jóna Gunnarsdóttir, 13.7.2008 kl. 01:14]

Til hamingju með árangurinn hjá strákunum í ÍBV, þeir eru virkilega að standa sig þetta sumarið.

Mér heyrist lundaveiðin fara ágætlega af stað, þú talar um nokkuð af unglunda í einni ferðinni. Hvernig er aldurinn svona almennt? Er ég þá að fiska eftir því hvort ,,spekingarnir" hafi rétt fyrir sér í sínum hrakspám. 

[Sigurður Þórðarson, 13.7.2008 kl. 15:33]

Vestmanneyjaliðið hefur hingað til ekki verið árennilegt á heimavelli. Þið eruð á uppleið í efstu deild þar sem þið eigið heima.

Eins og mér finnst sjófuglinn góður hef ég aldrei komist almennilega upp á lag með að borða hann reyktann. 

Hvernig er það er mikið um sel við eyjarnar?

[Georg Eiður Arnarson, 13.7.2008 kl. 22:59]

Sæl verið þið , varðandi aldurinn á Lundanum þá er útlitið óvenju gott því oft fæst ekki mikið af ungfugl fir en um og eftir þjóðhátíð en nú þegar er farið að bera á ungfugli en þetta skírist betur seinna .

það er ekki mikið af sel en samt alltaf einn og einn . kv .

PS, þeir voru að koma úr Ístakletti áðan með 1200 lunda eftir tvo daga og sjálfur fékk 120 í dag .