Stóri Bramafiskurinn

Vegna spurninga um stóra bramafiskinn í fyrri færslu, ákvað ég að skrifa þessa færslu. Ég hef veitt svona fisk bæði djúpt austan og vestan við eyjar, en ekki á grynnri sjó en 60 faðma dýpi. Kunningi minn á trillu fór s.l. miðvikudag djúpt suður fyrir eyjar, eða niður á 80 faðma dýpi og fékk ca. 70-80 kg af þessum fiski, en hver fiskur er 1-2 kg. Besta lýsingin á þessum fiski er sennilega sú, að hann sé mitt á milli karfa og makríls. Hann er aðeins stærri en karfinn, en töluvert mjórri. Hann er sléttur eins og makríllinn og með alveg eins sporð. Hann er hinsvegar greinilega ránfiskur, því hann er með tvöfalda röð af tönnum uppi í sér og hef ég fengið hann bæði á handfæri sem ég er að slaka niður og á línu, sem liggur á botninum. Þess má geta að ég heyrði í skipstjóra á stóru línuveiðiskipi frá Grindavík, sem var sunnan við eyjar í síðustu viku og var hann kominn með rúmlega hálft kar af þessum fiski, eða ca. 250-300 kg. Fiskurinn er ægifagur þegar hann kemur upp úr sjónum, eða nánast fjólublár og eru litirnir í uggunum sérlega fallegir og nánast eins og regnbogi, því þeir skipta litum, eftir því hvernig sólin fellur á þá. Þegar hann hinsvegar drepst, þá breytist liturinn og hann verður nánast grásilfraður.

Meira seinna.

Athugasemdir

[Árni Sigurður Pétursson, 27.8.2008 kl. 15:35]

Hann Óli Már sagði við okkur að hann hefði greinilega lennt í torfu af þessum fisk þegar að hann kom með þessi 70 - 80 kg í land á síðasta fimmtudag.

hefði komið mest aðalega í einu reki hjá sér þar sem að þetta var á öllum rúllum

Þess má einni geta að það voru seld rúm 700 kíló á mörkuðunum á föstudagin var, þannig að það virðist vera slatti af þessum fisk hérna, sem að áður veiddist eitt og eitt stykki af á ca 10 ára fresti.