Lundasumarið 2008

Þrátt fyrir að ég hafi bæði séð lundapysju í höfninni í morgun og lunda á sjónum í gær, þá ætla ég að skrifa mína lokagrein um lundasumarið núna.

Bæjarpysjan í Vestmannaeyjum sýnist mér að verði ca. 600 og er það í sjálfu sér gríðarleg vonbrigði. Ef ég hinsvegar reyni að horfa á það jákvæða og reikna fjöldann í Vestmannaeyjum á svipaðan hátt og ég hef gert hingaðtil, þá lítur þetta út svona:

Ég hef oft borið það undir mér eldri og reyndari menn, hvort að ekki væri nægilegt að tala um bæjarpysjuna sem 1/2% af þeim fjölda pysja, sem komast á legg í Vestmannaeyjum og eru flestir sammála mér í því, en margir vilja hafa töluna enn lægri. Þetta þýðir sem sé, að ein bæjarpysja þýðir ca. 200 pysjur frá Vestmannaeyjum. Þannig að 600 pysjur gera því 120 þús. pysjur. Þessi fjöldi er að mínu mati ekki nægilegur til þess að hefja veiðar af fullum krafti næsta sumar, en ef það er eitthvað sem er jákvætt við þennan fjölda, þá er þetta þó ca. 5 sinnum meira magn heldur en veitt var í sumar, en mér sýnist heildar lundaveiðin í Vestmannaeyjum hafa verið 17-18 þús. lunda. Einnig er jákvætt að þetta þýðir, að lundaveiðin í sumar var sjálfbær. Magnið er hins vegar allt of lítið til að fara í alvöru veiðar og ljóst að þær breytingar sem eru að verða í náttúrunni geta hugsanlega orðið til þess á næstu árum, að lundaveiðar leggist alveg af. Ég tek það hins vegar fram, að lundastofninn er gríðarlega sterkur. Ég hins vegar met ástandið þannig að ekki sé rétt að ákveða með veiði á næsta ári, fyrr en við sjáum um mánaðamótin júni/júli næsta sumar hvernig útlitið er og verði útlitið verra en núna í sumar, þá tel ég ekki verjandi að lundi verði veiddur, en verði útlitið svipað eða betra, þá væri ég til í skoða þann möguleika að veiðar yrðu leyfðar í ca. 10-15 daga fyrir Þjóðhátíð næsta sumar.

Töluverð umræða hefur verið um svo kallaðar atvinnuveiðar og/eða að menn veiði sér í soðið. Ég er á þeirri skoðun, að allir eyjamenn eigi rétt á að fá lunda í soðið fyrir Þjóðhátíð, ef yfirhöfuð á að veiða lunda. Ég hef hins vegar rekið mig á það, að í sumum veiðifélögunum þar sem út á við er talað um að menn veiði aðeins í soðið, þá er það nú ekki alltaf svo og þekki ég dæmi um það að menn hafi veitt það mikið magn að það dugi þeim í soðið næstu árin, en nóg um það.

Lundaballið er um næstu helgi og ætla ég ekki að mæta á það, frekar en vanalega og ég held að vinur minn Páll Scheving hafi kannski orðað það best, þegar hann sagði:"Er þetta lundaball ekki bara fyrir fólk sem étur mikinn lunda?" Ekki veit ég, hvort að það er rétt, en við tókum hins vegar eftir því, að í auglýsingu fyrir ballið eru talinn upp öll veiðifélögin, nema veiðifélagið Heimaey. Upp er komin sú hugmynd, að halda lokahóf lundaveiðifélagsins Heimaey næstkomandi laugardag og er nú þegar skemmtinefnd byrjuð að starfa og eftir að hafa hlerað hana lítillega í dag, þá skilst mér að meðal skemmtiatriða verði hugsanlega formaður Bjargveiðifélags Vestmannaeyja í ár með sýnikennslu í hvernig eigi að stelast í veiði hjá öðrum veiðifélögum og að hugsanlega muni Erpur Snær mæta í búningi fuglahræðu og taka fugladansinn við undirleik. Veislan verði í Blíðukró á laugardagskvöldið, eitthvað er lítið um miða á skemmtunina, en það er talað um að enginn komist inn, nema að hann hafi að minnsta kosti veitt meiri en 200 lunda í sumar.

Athugasemdir

[þs (IP-tala skráð) 24.9.2008 kl. 21:33]

Sæll vertu Georg,,þessi pistill þinn, er ekki svo galin, og er ég  að mestu sammála þér.Bann á lundaveiði er nátúrlega eitthvað sem er ekki tímbært að setja á,auðvitað verður ekki möguleiki á að veiða lunda í sölu,þessi tillaga þín um veiðidaga og þá í soðið.er eitthvað sem hljómar þokkalega, því miður hef ég ekki hef nokkra þekkingu á því sem þeir félagar í "setrinu" eru að bardúsa,en í gamladaga sagði höfnin okkur um ástand á "klaki" lundans og eins og þú hefur réttilega sagt þá eru mikil vonbrigði hversu lítið sést af pysju þar,og klárlega segir það sögu sem ekki verður horft framhjá..En,það sagði maður í "denn" svona handa þeim í "setrinu"..til umhugsunar,vegna þess að í málum af þessum toga má enginn fara OFFARI..

Veið´ann þá lítið og helst ekki neitt

lætur hann ganga róginn.

Finni hann fölnað laufblað eitt

þá fordæmir hann skóginn.

kv þs

[Georg Eiður Arnarson, 24.9.2008 kl. 21:51]

Takk fyrir þetta Þórarinn , sérstaklega þetta með OFFARI . kv .

[Magnús Bragason, 24.9.2008 kl. 21:57]

Hættu þessu væli Goggi og komdu á ballið. Vertu bara feginn að þurfa ekki að standa í að skrá á ballið, en þú segir:"en við tókum hins vegar eftir því, að í auglýsingu fyrir ballið eru talinn upp öll veiðifélögin, nema veiðifélagið Heimaey." Í auglýsingunni er bara stóru veiðifélögin sem standa fyrir lundaballinu. Þú ættir nú að vita að það eru fleiri veiðifélög í Eyjum og það eldra en ykkar, s.s. veiðifélag Stórhöfða og í Hana.

Pússa spariskóna og finna slaufuna og ég skal galdra handa þér einn bjór  

[Stefán Þór Steindórsson, 26.9.2008 kl. 12:41]

innlegg mitt í lundaveiðitímabilið er hér    http://rocco22.blog.is/blog/rocco22/entry/653039/

[Georg Eiður Arnarson, 26.9.2008 kl. 18:18]

Sæll Maggi , er ekki Heimaey bæði stærsta eyjan og með lang stærsta Lundavarpið ? sennilega er Lundabyggðin á neðrikleifum sambærileg og í Hellisey . Nei Maggi minn að mæta á Lundaball þar sem formaðurinn bæði stalst í veiði á Heimey og er upphafsmaðurinn að allskonar samsæris og lygasögum um suma okkar , nei takk . En hver veit hvað verður á næsta ári ? Kannski veiðifélagið á Heimaey verði talið með næst og þá er aldrei að vita .