Þessi er góður

Nonni litli var aðeins farinn að velta fyrir sér lífinu og tilverunni og einn daginn fór hann til pabba síns og spurði hann: "Hvað eru stjórnmál?"

Pabbi hans svaraði: "Jú sjáðu til, það er kannski best að ég útskýri það á þennan hátt: Ég vinn fyrir fjölskyldunni og þess vegna skulum við kalla mig Auðmagnið. Mamma þín stýrir heimilinu og ræður útgjöldunum og þess vegna skulum við kalla hana Stjórnvöld. Við erum til þess að sinna þörfum þínum svo við skulum kalla þig Fólkið. Við getum síðan haldið áfram og kallað barnfóstruna Öreiga. Litla bróður þinn skulum við kalla Framtíðina.

Farðu nú og veltu þessu fyrir þér og athugaðu hvort þetta kemur ekki heim og saman. þannig að Nonni litli fór í háttinn og hugsaði stöðugt um það sem pabbi hans sagði honum.

Um nóttina vaknar hann upp við grátinn í bróður sínum. þegar hann kemur inn í herbergi hans finnur hann fljótt að bleian hans er blaut og mikil fýla af henni. Hann fer inn í svefnherbergi foreldra sinna og finnur mömmu sína sofandi. þá fer hann að herbergi barnfóstrunnar og finnur að hurðin er læst. Hann kíkir inn um skráargatið og sér föður sinn í rúminu með barnfóstrunni.

Að lokum gafst Nonni litli upp og fór aftur í herbergi sitt og sofnaði.

Næsta morgun segir hann við föður sinn. "Pabbi, ég held núna að ég skilji hvað stjórnmál ganga út á." Gott segir faðirinn, segðu okkur frá því. þá sagði Nonni litli: " Jú sjáðu til, á meðan Auðmagnið riðlast á Öreigunum er Ríkisstjórnin steinsofandi. Fólkið er hundsað og Framtíðin er í djúpum skít...

Smá pólitík, loðna, gæludýrafóður, lifur, Godthaab og róður

Enn er ekki komið á hreint, hverjir leiða lista Frjálslynda flokksins í Suðurkjördæmi, en ég á þó von á því að það fari að skýrast.

Það vakti athygli vinar míns hér í Eyjum, spjall tveggja manna sem spáðu því, að Sjálfstæðs flokkurinn ynni stór sigur í kosningunum í vor. Þetta þótti okkur mjög undarleg spá, því eins og allir landsmenn vita, þá er það Sjálfstæðis flokkurinn sem ber einn mesta ábyrgð á hruni bankanna og því að Íslenska þjóðin sé á barmi gjaldþrots. Annað sem vakti athygli mína úr pólitíkinni í vikunni var grein í Fréttum eftir Samfylkingarmanninn og fyrrum nágranna minn, Róbert Marshall, þar sem Róbert talar um að nú verði að fara að breyta kvótakerfinu, mjög merkilegt, enda Samfylkingin búin að vera í Ríkisstjórn í 2 ár og hvorki heyrst hósti né stuna um kvótakerfið allan þann tíma og greinilegt að sumir eru komnir í bullandi kosningabaráttu.

Það er mikill hugur í Eyjamönnum vegna komandi loðnuvertíðar og vonandi fer að finnast eitthvað meira af loðnu, núna eru hins vegar 30 metrar á Höfðanum og hauga bræla og ekki ólíklegt að loðnan verði komin að minnsta kosti að Eyjum þegar hann lægir, en það á að lægja seinni partinn á morgun. Gulldeplu veiðarnar hafa einnig gengið mjög vel og fékk ég smá sýnishorn í dag og reyndi að nota það til beitu, en þetta er því miður allt of smátt og fíngert, svo sú tilraun gekk ekki.

Það jákvæðasta sem ég sá í vikunni og vakti hvað mesta athygli mína, tengist áhuga mínum á frekari atvinnusköpun. Fyrir það fyrsta, þá hef ég einhvern tímann talað um, að við Íslendingar ættum að hefja framleiðslu á gæludýra fóðri úr afskurði af fiski og kjöti og var því mjög ánægjulegt að rekast á Íslenskt þurrfóður í Hveragerði síðustu helgi og eru kettirnir á heimilinu yfir sig ánægðir og kannski merkilegast, að þetta fóður er þrisvar sinnum ódýrara heldur en þetta innflutta. Afar jákvætt. Einnig vakti athygli mína, frétt af fyrirtæki í Grindavík, sem byrjaði fyrir tveimur árum með þremur starfsmönnum, en núna starfa þar 20 manns. Merkilegt nokkuð við að sjóða niður lifur, svo maður spyr sig, hvað er að gerast með Lifrarsamlag Vestmannaeyja? Enda kom fram í fréttinni, að þetta fyrirtæki hefði ekki undan öllum pöntununum. Ég veit reyndar að stærsta vandamálið hjá Lifró í Eyjum, hefur verið hráefnisskortur vegna þess að útgerðarmenn í Eyjum fást ekki til að hirða lifrina og er það miður.

Mig langar sérstaklega að hrósa þeim í Godthaab fyrir það, að vera sífellt að fjölga þeim afurðum sem þeir selja, ekki veitir af að reyna að selja meira af full unninni vöru, þegar að allar frystigeymslur eru að fyllast af frosnu hálfunnu hráefni og mættu önnur stærri fyrirtæki taka sér þá til fyrirmyndar.

Fór á sjó á þriðjudaginn með 15 bala. Fiskiríið var ágætt eða liðlega 2,5 tonn, en það sem vakti mesta athygli í róðrinum var að meirihlutinn var þorskur, sem er kannski besta vísbendingin um það, að loðnan er á leiðinni.

Meira seinna

Kjördæmisþing, kosningar, róðrar, síld, kvótaverð og landsþing

Það var góður fundur uppi í Sægreifanum s.l. föstudag, þar sem við í Frjálslynda flokknum í suðurkjördæmi vorum með kjördæmisþing. Mætingin var framar vonum og sérstaklega var ánægjulegt að sjá mörg ný andlit og mjög ánægjulegt að sjá töluvert af ungu fólki að mæta af báðum kynjum. Nýtt kjördæmisráð var kosið og urðu ekki miklar breytingar, en mjög gott að sjá ungar konur koma þar í kjördæmisráð. Við Eyjamenn vorum þó nokkrir á fundinum en buðum okkur ekki fram. Framundan er mikil vinna hjá kjördæmisráði að ákveða, hvort að stillt verði upp á lista eða kosið, nú þegar eru nokkrir búnir að gefa sig fram til að vera í forystusveit flokksins í kjördæminu um kosningarnar í vor, en þetta skýrist vonandi um næstu mánaðamót.

Ótrúlega margir hafa haft samband við mig og skorað á mig að bjóða mig fram á listann, en ég hef ekki tekið neina ákvörðun ennþá, enda annir það miklar þessa dagana að maður sér nú varla fram úr þeim átökum.

S.l. hálfan mánuð er ég búinn að róa eina 10 róðra og fiskað að jafnaði 2 tonn í róðri (var með 2,9 tonn á fimmtudaginn á 13 bala) eða samt. góð 20 tonn, sem að telst nú alveg þokkalegt hér í Eyjum. Ágætur vinur minn sem hefur verið sjómaður í rúm  30 ár, sagðist ekki muna annað eins tíðarfar í janúar síðan 1977. Eina sem ég hef áhyggjur af núna er að sumarið 2005-06 og 07 voru afar hagstæð með miklu hægviðri og hitum, en á móti voru veturnir afar harðir með miklu hvassviðri og stormum, svo nú er spurningin sú, hvort að þetta sé kannski að breytast, en það kemur þá bara í ljós í sumar.

Það hefur verið mikið fjallað um síldina í höfninni hér í Eyjum og eru síðustu fréttir þær, að sést hafi stórhveli inni í Friðarhöfn. Ég get hins vegar staðfest það, að þetta er ekkert að minnka. Það eru komnar 6 vikur síðan að síldin fór að vaða hér inn í höfnina og þegar ég var að landa núna fyrir helgi, kom til mín Magnús Ríkharðsson, skipstjóri á Drangavík, og sagði mér það, að hann hefði ný gengið hringinn inni í Friðarhöfn og tekið eftir því, að það er farið að bregða fyrir ýsu og öðrum góð fiski inni í Friðarhöfn, svo það kemur ekki á óvart þó að hvalurinn láti líka sjá sig, enda mikil veisla í höfninni í Eyjum í dag.

Stærstu áhyggjur útgerðarmanna í dag, eru lækkandi afurðarverð og því miður er nú komið á daginn að varnarorð  þingmanna okkar FF um þá ákvörðun fyrrverandi sjávarútvegsráðherra, að hækka geymslu prósentuna af aflaheimildum milli fiskveiðiára úr 20% í 33% komin fram, því að vegna þessa mikla geymsluréttar þá virðist engu máli skipta, hversu mikið fiskverðið á mörkuðunum lækkar, leigan lækkar ekki í samræmi, og er þessi ákvörðun fyrrverandi sjávarútvegsráðherra enn eitt dæmið um það, hvernig sjávarútvegsráðherrar Sjálfstæðisflokksins síðustu ára láta hagsmuna aðila draga sig á asnaeyrunum og skaða atvinnugreinina, bæði innanlands og erlendis, enda hafa nú þegar fjölmargir leiguliðar lagt bátum sínum og skráð sig atvinnulausa og ég held, að það sé nokkuð augljóst mál að fleiri atvinnulausa er ekki það sem okkur vantar, en svo er aftur stór spurning, hvað  núverandi stjórnvöld gera, en það kemur þá bara í ljós.

Nú hefur verið tekin ákvörðun um að landsþing Frjálslynda flokksins verði á Stykkishólmi dagana 13-15 mars. Í sjálfu sér er ekkert við því að gera, en ég hefði nú kannski frekar viljað sjá þetta landsþing á höfuðborgarsvæðinu, en ég tók eftir því á bloggsíðum sumra Frjálslyndra á höfuðborgarsvæðinu að þar er töluverður grátur yfir þeim kostnaði, sem fylgir því fyrir höfuðborgarbúa að fara til Stykkishólms og gista hugsanlega og nokkuð greinilegt að þar er á ferð fólk, sem að virðist ekki alveg skilja það að það kostar jafn mikið að fara frá landsbyggðinni til höfuðborgarinnar og gista þar, að maður tali nú ekki um kostnað okkar eyjamanna við að sækja þessar ráðstefnur, en ég held að fólk á höfuðborgarsvæðinu mætti kannski stundum taka svolítið tillit til okkar á landsbyggðinni.

Meira seinna.

Af framboðum til Alþingis

Ný ríkisstjórn er að fæðast í dag og óska ég henni alls góðs, þó svo að ég hafi nú ekki mikla trú á neinum stór afrekum á þessum stutta tíma fram að kosningum.

Framsóknarmenn fara mikinn þessa dagana og vilja meina það að það hafi orðið stórkostleg endurnýjun í forystu flokksins, en mér er hins vegar sagt að á bak við nýja formann flokksins, standi enginn annar en Finnur Ingólfsson, sem lengi hefur verið ráðandi afl innan flokksins, svo ekki er ég mjög bjartsýnn á að þarna verði einhverjar raunverulegar breytingar, t.d. hefur flokkurinn ekki ennþá minnst á kvótakerfið og er þar með að gera nákvæmlega það sama og hann hefur alltaf gert þ.e.a.s. haga seglum eftir vindi.

Sjálfstæðisflokkurinn er að detta úr ríkisstjórn í fyrsta skiptið í 18 ár og ég held að flestir geri sér grein fyrir því að það var orðið löngu tímabært, vandamálið er kannski það, að ekki lýst mér nú alveg á þá sem taka við, en það kemur þá bara í ljós. Hér í Vestmannaeyjum eru íhaldsmenn komnir á fleygi ferð við að skora á hvern annan í framboð og t.d. er bæjarstjórinn okkar að skoða sinn gang. Það kemur mér hins vegar ekkert á óvart, því að ég spáði því fyrir tveimur árum síðan, einnig hefur þingmannsdraumurinn, að mínu mati, háð honum illilega í starfi fyrir Vestamanneyinga, enda hefur hann verið helsti stuðningsmaður þeirrar samgönguáætlunar sem að hentar ríkisstjórninni. Það er svolítið merkilegt að horfa líka á það gríðar mikla starf sem íhaldsmenn vinna allan ársins hring hér í Eyjum, t.d. eru um jól og áramót gefin út tvö blöð. Stofnar, þar sem í eru myndir af þeim börnum sem fæðast á árinu og Fylkir, þar sem í eru myndir af þeim Eyjamönnum sem látist hafa á árinu. Á milli þessara tveggja blaða er hægt að telja upp ýmislegt t.d. grímuböll, grillveislur, allskonar félagsskapur, úteyjaferðir, tuðruferðir og sfr. og sfr. og endar svo þetta með því að öllum á elliheimilinu er boðið í kaffi og með því, svo það má svo sannarlega segja það að íhaldsmenn hugsi um fólkið, það væri óskandi að þeir gerðu jafn vel í því að hugsa um byggðirnar, auðlindirnar sem og framtíðina, því að allt þetta starf er að sjálfsögðu unnið fyrir flokkinn.

Samfylking og Vinstri grænir eru komnir í ríkisstjórn og fer nú léttur hrollur um margan íhaldsmanninn. Að mínu mati er nánast enginn munur á Samfylkingu og Framsóknarflokki. Báðir þessir flokkar hafa fyrst og fremst hagað seglum eftir vindi, nema í einu undantekningatilliti, þ.e.a.s. þessi furðulegi áhugi Samfylkingarmanna á inngöngu i ESB og nokkuð ljóst, í mínum huga alla vega, að Samfylkingin er tilbúin að fara þar inn þó að það kosti okkur einhverjar hlutdeildir í auðlindum okkar. Merkilegast er þó að sjá Vinstri græna beygja sig í þessa átt, reyndar hefur mér alltaf fundist Vinstri grænir vera svo mikill öfgaflokkur og stundum velt því fyrir mér, hvort að draumur Vinstri grænna sé sá að allir Íslendingar sameinist um að fara út  á tún og bíta gras, því að þannig erum við að sjálfsögðu öll jöfn, en mér segir svo hugur að Vinstri grænir muni ekki stoppa lengi í ríkisstjórn, enda ekki vanir að vinna í meirihluta.

Af mínum flokki, Frjálslynda flokknum, er það að segja að ekki erum við nú að skora hátt í skoðanakönnunum, en það höfum við reyndar aldrei gert. Framundan eru kjördæmisþing og svo landsþing og alveg ljóst, að innan flokksins eru háværar raddir sem vilja breytingar í forystu flokksins. Ég hef fyrir mitt leyti sagt það, að ef fólk er óánægt og vill breytingar, þá á það einfaldlega að bjóða sig fram og því fleiri því betra, en hvort að einhverjar breytingar verði og/eða hvort að þær verði til góðs fyrir flokkinn get ég ekki metið, en það kemur þá bara í ljós. Frjálslyndi flokkurinn er enn sem komið, kannski því miður, eini flokkurinn sem vill takast á við núverandi kvótakerfi og ég held að fólk ætti að gera sér grein fyrir því, svo ég vitni nú í ekki ómerkari mann en prófessor Þorvald Gylfason, að kvótakerfið var byrjunin á hruni fjármálageirans og enginn flokkur annar en Frjálslyndi flokkurinn boðar, enn sem komið er, neinar breytingar á kvótakerfinu.

Meira seinna.

Fór á sjó í morgun og ÍBV

Fór á sjó í morgun, í fjórða skiptið í þessari viku, enn er höfnin full af síld og mikil veisla í gangi hjá fuglinum. Í gær sá ég m.a. sel í höfninni, veðrið í dag var afar fallegt og það lang besta í langan tíma. Aflinn var góður 2,2 tonn á 12 bala. Þorskurinn er farinn að aukast í aflanum, en hlutfallið sleppur ennþá, fékk m.a. tvo hafála í dag og eina 30 kg lúðu, sem ég rétt náði að kraka í áður en hún losnaði af króknum. Það er kannski lýsandi fyrir tíðarfarið í vetur, að miðað við veðurspána þá verður sennilega veður á morgun og er þetta þá sennilega fyrsta heila vikan í janúar, sem ég get róið í mörg ár. Reyndar var veðrið ekkert spennandi hvorki í gær eða fyrradag, en maður lét sig hafa það. Ég er farinn að fylgjast svolítið mikið með belging.is, enda veðurspáin þar yfirleitt mjög nákvæm, eini gallinn er þó sá, þessi síða ræður ekki við austanáttir, spáði t.d. lægjandi ítrekað í gærdag en aldrei lægði. Vonandi verður þetta gott á morgun en hann á að hvessa seinni partinn.

Ég mætti á fund uppi í Týsheimili s.l. laugardag. Þar var komið mikið fjölmenni, enda mikil íþróttahefð í eyjum. Það er alveg ljóst að íþróttahreyfingin er þegar farin að finna fyrir kreppunni, enda nokkrir sterkir styrktaraðilar í gegnum árin búnir að tilkynna, að það komi ekki styrkur í ár. Margt annað hefði verið hægt að segja um þennan fund, en mig langar þó að nefna eitt atriði sérstaklega og það er hugmyndir sumra sem eru og tengja sig fyrst og fremst við fótboltann, um að leggja hugsanlega niður aðrar deildir innan ÍBV til þess að fá meiri fjármuni í fótboltann. Þó að ég sé nú mikill stuðningsmaður fótboltans í eyjum, þá er ég þessu algjörlega ósammála, enda þurfum við á fjölbreytninni að halda. Íþróttastarfið á að snúast um börnin okkar fyrst og fremst, þó ég neyti því ekki að það er alltaf ánægjulegt þegar okkar efstu flokkar ná árangri, en aðal atriðið er þetta, eins og ég hef sagt áður: Íþróttir eru það besta fyrir börnin okkar til að kenna þeim að takast á við framtíðina, bæði líkamlega og andlega. Ekki veitir af eins og staðan er í dag.

Meira seinna.

Kosningar, róður, síld og hrafninn flýgur

Ég er ánægður með það að það verður kosið í vor, vonandi verður næsta ríkisstjórn betri heldur en sú, sem er farin frá og ekki væri verra að sjá helstu stefnumál Frjálslynda flokksins ná fram í næstu ríkisstjórn. Framundan er stutt og snörp kosningabarátta, þar sem við i FF vonumst eftir dyggum stuðningi, enda vita það allir að flokkurinn ber enga ábyrgð á fjármálakreppunni og hefur ítrekað bent á margvíslegar leiðir til þess að auka tekjur þjóðarinnar, t.d. með breytingum á kvótakerfinu. Framundan er uppstilling á listum, en mig langar að benda fólki, sem hefur áhuga á að vera með, að enn er möguleiki á því.

Ég er búinn að róa þrisvar s.l. viku, með samt. 40 bjóð, aflabrögð hafa verið ágæt, eða samt. 6 tonn í þremur róðrum, mest ýsa. Einnig er farið að bera töluvert á þorski í aflanum og eru komin þessi fínu hrogn í allan þorsk.

Það hefur vakið töluverða athygli síldin í höfninni og þegar ég var að fara á sjó í gær, þá sá ég að það hefur ekkert minnkað og eru stórar torfur allt í kring um eyjarnar. Ég viðraði þá hugmynd fyrir nokkru síðan við yfirmenn FES, hvort að ekki væri möguleiki hreinlega að dæla síldinni bara upp úr höfninni, bræða hana og gera þannig pening úr þessu, en það er víst ekki hægt, vegna þessa fáránlega kvótakerfis, því að þó að þessi síld sé öll að dauða komin í höfninni, þá þarf samt kvóta fyrir henni.

Eitt af því sem hefur vakið athygli náttúru unnenda mest að undanförnu í eyjum, er gríðarleg fjölgun hrafna og náði einn maður að telja yfir 40 hrafna í eyjum fyrir stuttu síðan. Sjálfur taldi ég 35 stykki fyrir nokkru síðan, margir hafa áhyggjur af því hvaða áhrif fjölgun hrafnsins komi til með að hafa í sumar á svartfuglastofnana t.d er alþekkt að lundinn forðar sér langt út á haf þegar að krumminn lætur sjá sig og stór spurning, hvort að ekki þurfi að fara að grisja þennan stofn, en mér skilst reyndar að hrafninn sé friðaður.

Meira seinna.

Frjálslyndir hafna inngöngu í ESB og boða til miðstjórnarfundar

Miðstjórnarfundur Frjálslynda flokksins samþykkti nú fyrir stundu að landsþing flokksins verði haldið dagana 13. 14. og 15. mars. Miðstjórn hafði áður falið framkvæmdastjórn flokksins að ákveða fundarstað.

Nú stendur yfir miðstjórnarfundur Frjálslynda flokksins. Á fundinum var kynnt niðurstaða úr skoðanakönnun sem gerð var meðal flokksmanna. Niðurstöður eru þær að við spurningunni hvort Ísland ætti að leita eftir aðild að ESB:
Já, svöruðu 34,8%
Nei, svöruðu 51,6%

Óákveðnir eru 9,5%

Einn seðill var ógildur eða 0,5%

Af mótmælum

Það er nokkuð um að fólk hneykslist á þessum mótmælum við þinghúsið í Reykjavík og í sjálfu sér er að hluta til hægt að taka undir það, sérstaklega þegar fólk gengur of langt t.d. skaðar almanna eignir, sig sjálft eða lögregluna, sem dæmi. Mér finnst hins vegar ósköp eðlilegt að ungt fólk mótmæli harðlega, því það er undantekningalaust fólkið sem að ber enga ábyrgð á kreppunni. Unga fólkið er það fólk í dag sem mun, við óbreytt stjórnkerfi, aldrei hasla sér völl í t.d. útgerð eða öðru slíku. Það mun hins vegar þurfa að borga reikninginn og er því að mínu mati í fullum rétti með að mótmæla. Dapurlegast þótti mér þó að sjá skoðanakannanir meðal ungs fólks, þar sem mikið af því er nú þegar farið að þreifa fyrir sér með atvinnu í öðrum löndum. Afar slæmt fyrir okkur öll og með ólíkindum að horfa upp á ráðamenn þjóðarinnar sitja sem fastast.

Fundur Frjálslyndra, Eyjafréttir, heilbrigðisþjónustan, góð bók og róður

Fundur var haldin í fyrrakvöld í Eyjum með Grétari Mar Jónssyni, alþingismanni og Kolbrúnu Stefánsdóttir, ritara Frjálslynda flokksins. Fundurinn var góður en fámennur og því miður virðist fólk  hér ennþá vera í sama ástandi og fyrir bankakreppuna, þ.e.a.s. sofandi og áhugalaust um framtíð sína. Fyrr um daginn hinsvegar, fórum ég og Grétar í kaffi á nokkrum stöðum og áttum víða góðar og áhugaverðar umræður um alls konar mál. Á fundinn kom m.a. maður frá Eyjafréttum í Vestmannaeyjum, sem að ég veit ekki til þess að hafi gert eitthvað af því að skrifa fréttir yfirleitt, en hefur hins vegar tekið mikið af myndum í Vestmannaeyjum. Inni á Eyjafréttum er nú komin grein um fundinn eftir þennan "fréttamann" sem að ég er ekki alls kostar sáttur við og tek hér sem dæmi úr fyrirsögn greinarinnar: "Grétar Mar vill ekki að fjárframlög til flokkana frá ríkinu verði skorin niður." Þetta er í sjálfu sér nokkuð augljóst, því að hvernig væri pólitískt umhverfi okkar, ef aðeins þeir sem hefðu peningalega bakhjarla gætu boðið fram. Það vakti hins vegar athygli mína að "fréttamaðurinn" hafðu furðulega mikinn áhuga á þessu máli og var að reyna að tengja saman fjárframlög til flokkana við niðurskurð til heilbrigðisþjónustuna. Þetta þótti mér hálf furðulegt, enda er verið að tala um niðurskurð í heilbrigðisgeiranum upp á nokkra milljarða, á meðan að framlög til flokkana er kannski á annað hundrað milljónir (veit reyndar ekki rétta tölu).

Önnur fyrirsögn fréttamannsins er svona:" Grétar Mar vill banna allan útflutning á fiski í gámum" en svo kemur aftur alveg neðst í greininni:" Grétar viðurkennir reyndar að hann hafi verið hlynntur gámaútflutningi." Staðreyndir er hins vegar þessi: Grétar Mar er að opna á þann möguleika að hugsanlega verði sett lög, sem banna gámaútflutning tímabundið til þess að auka atvinnuna í fiskvinnslum landsins. Annað sem að vakt athygli mína og kom ekki fram í grein fréttamannsins, er að Grétar vill að bæði verði aukið meiri við þorskkvótann heldur en nú hefur verið gert og auk þess að þegar verði aukið við síldarkvótann um ca. 50-100 þús. tonn, síldveiðiflotanum beitt sérstaklega á þau svæði þar sem mest er af sýktri síld og hún veidd til bræðslu. Þetta myndi að sjálfsögðu vera góð búbót fyrir landið okkar, ekki veitir af.

Fundurinn var eins og áður segir mjög góður og Grétar Mar kom mér skemmtilega á óvart í umræðum við eldri borgara um lífeyrissjóðsmál, þar sem hann var greinilega búinn að kafa svo rækilega ofan í þau málefni, að það vakti furðu mína, því ég skildi nú ekki sjálfur helminginn af þessu. Kolbrún Stefánsdóttir stóð sig einnig mjög vel, en mér þótti dapurt að enginn fatlaður skyldi láta sjá sig, því hún er framkvæmdastjóri Sjálfsbjargar, landssamband fatlaðra.

Það mál sem vekur mesta athygli í eyjum þessa dagana er hugsanlegur niðurskurður á heilbrigðisþjónustunni og ég verð að segja alveg eins og er, að það vakti furðu mína yfirlýsingar bæjarstjórans, um að það mætti ekki skera niður þjónustuna, vegna þess að það tæki okkur 4 klukkutíma að komast upp á Selfoss, svo spurningin er þessi:" Þegar og ef þessi Bakkafjara kemst einhvern tímann í gagnið, verða þá ekki rök heilbrigðisráðherra þau, að það taki okkur aðeins 11/2 til 2 tíma að komast upp á Selfoss?" Ótrúlegt hvernig þetta er allt saman að stefna, því miður, nákvæmlega í þá átt sem ég spáði fyrir rúmum tveimur árum síðan.

Mig langar að benda áhugasömum bókaunnendum á bók sem ég er að lesa þessa dagana: Annasamir dagar og ögurstund, endurminningar Stefáns Runólfssonar. Það sem vekur hvað mesta athygli mína við þessa bók er, að Stefán með alla sína áratuga reynslu á fiskvinnslu í Eyjum, sem og margs konar aðkomu að t.d. byggingu Herjólfs á sínum tíma, talar um kvótakerfið sem tóma vitleysu og Bakkafjöru sem tímaeyðslu, því að það eina sem Eyjamenn vanti, er stærri og gangmeiri Herjólfur.

Fór á sjó í gær kl. 10 um morguninn með aðeins 8 bjóð, enda tíðin mjög erfið þessa dagana, fiskiríið var ca. 800 kg., en til að enda þetta á jákvæðum nótum, þá tók ég eftir því að þegar ég var að keyra frá Friðarhöfninni í áttina að smábátahöfninni eftir löndun, að klukkan var orðin 17:30 og það var enn ekki orðið svarta myrkur og brá bláum bjarma yfir eyjuna, þannig að daginn er tekið að lengja, vonandi fer líka bráðum að birta upp í öðrum málum, því eins og stundum er sagt:" Einhvern tímann  styttir upp."

Meira seinna.

Fundur með Frjálslyndum

Frjálslyndir funda í Vestmannaeyjum

Fundarboð

 Kolbrún       Grétar

Kolbrún Stefánsdóttir ritari Frjálslynda flokksins og Grétar Mar Jónsson alþingismaður Frjálslynda flokksins efna til fundar með Eyjamönnum og konum, n.k. fimmtudag, 15. janúar.  Fundurinn verður haldinn á Café Kró, Tangagötu 7 og hefst kl. 20:00.  Á dagskrá eru m.a: Samgöngur, fiskveiðistjórnun, hafrannsóknir og velferðarmál.

Fólk er hvatt til að mæta fá sér kaffisopa og heyra hvað Frjálslyndi flokkurinn er að aðhafast.Fjölmiðlar allavega ríkisfjölmiðlar hafa leitt flokkinn algerlega hjá sér.Núna gefst Vestmannaeyingum tækifæri til að spyrja þingmanninn og ritarann um það sem því liggur þyngst á hjarta:Sérstaklega eru öryrkjar og aldraðir og þeir sem minna  mega sýn í þjóðfélaginu bent á að koma og hlusta á hvað þau 2 hafa fram að færa