Áfram ÍBV og fleira

Það er gaman að fylgjast með ÍBV þessa dagana og greinilegt að liðið er á bullandi siglingu, en mig langar aðeins að minnast á bikarleikinn um daginn, sem við unnum 3-2 eftir framlengingu. Það vakti athygli mína að í viðtölum fyrir leikinn sagði Heimir þjálfari, að hann byggist við mjög erfiðum leik og var ég honum sammála þar, enda eru allir bikarleikir erfiðir, en þrátt fyrir það þá stillti hann ekki upp okkar sterkasta liði og í raun og veru vorum við aðeins 7 mín. frá því að detta út úr bikarkeppninni. Það er í sjálfu sér allt í lagi að aðrir leikmenn fái líka tækifæri, en í þessum leik voru það greinilega mistök, sem menn læra vonandi af.

Meira um boltann. Ég var staddur í Reykjanesbæ á sunnudaginn og horfði á Keflavík vinna KR nokkuð örugglega 4-2, þar sem fyrrum leikmaður okkar, Atli Jóhannsson fékk loksins tækifæri (en bara allt of seint), en mér finnst það alltaf jafn skemmtilegt og ánægjulegt að horfa á KR tapa og það verður enn skemmtilegra að sjá þá tapa á Hásteinsvelli á næsta ári (nema ef þeir falla), (vonandi fæ ég ekki skammir frá búkollu, bloggvinkonu). Áfram ÍBV.

Ég fékk DV með póstinum í dag og er þar lítil grein um Landeyjahöfn, en í sjálfu sér ekkert nýtt og þar fyrir utan, þá nenni ég ekki að skrifa um þetta meir, enda er málið alfarið úr okkar höndum. Ég kom hinsvegar með Herjólfi á sunnudagskvöldið og þótt að það væri hægur vindur og ekkert svo mikill sjór, þá lét skipið furðu illa og ljóst að það er löngu kominn tími á að endurnýja það, en því miður hefur bæjarstjórnin okkar ekki áhuga á því, svo enn verðum við að bíða.

Fundur hjá FF

Mér var boðið á Landsráðsþing Frjálslynda flokksins um helgina og átti þar mjóg fróðlegan og ánægjulegan dag, þar sem farið var vítt og breitt yfir málefnin og mun sú vinna halda áfram. Margt mjög athyglisvert kom þarna fram og var þar athyglisverðast tillaga frá formanninum um að úthluta 220 þús. tonnum í þorski næstu 3 árin, en stöðva á sama tíma loðnuveiðar, ef ekki mældust meira en 800 þús. tonn. Þetta er í sjálfu sér ágætis hugmynd, en ég er ekki viss um að eyjamenn væru mjög hrifnir af þessari hugmynd varðandi loðnuna.

Annað sem mér þótti athyglisvert var tafla um veiðiráðgjöf og veiðar á þorski í Barentshafi frá árinu 2000 (töfluna er hægt að sjá í heild sinni inni á xf.is), en þar kemur m.a. fram, að t.d. árið 2000 lögðu fiskifræðingar fram tillögur um að aðeins yrðu veidd 110 þús. tonn af þorski, en þessu höfnuðu Rússar alfarið og var þess í stað ákveðið að veiða 400 þús. tonn árið 2000. Það merkilega við þetta er, að á hverju ári síðan þá hefur altaf verið veitt meira en fiskifræðingar hafa lagt til, en samt hafa fiskifræðingar lagt til aukna veiði á hverju ári og er t.d. kvótinn í ár 400 þús. tonn af þorski. Þetta er útskýrt með þeim hætti, að í Barentshafi sé engin loðna veidd.

Þegar fundi lauk, var haldin stórveisla og eftir matinn var mikið um brandara og fjöldasöng og meira að segja tók formaðurinn að sér að syngja Færeyskt lag við góðar undirtektir. Ég þakka fyrir mig.

Kvótinn

Það er frekar hart í ári hjá leiguliðum þessa dagana og ég var að fá þær fréttir af suðurnesjunum, að þar stefni í fjölda gjaldþrot margra minni útgerðarmanna og m.a. hringdi í mig maður í dag, sem hefur verið að beita á suðurnesjunum, til að reyna að selja mér nokkur línubjóð, sem var það eina sem hann gat fengið upp í það sem hann átti inni hjá útgerðinni, því útgerðin var farin á hausinn og sagði mér m.a. dæmi um útgerðarmann, sem fór á sjó fyrir nokkru síðan, fiskaði 4,5 tonn, mest þorsk, en þegar útgerðarmaðurinn hafði borgað leiguna, beitninguna, beituna og olíuna, þá stóðu eftir aðeins innan við 100 þús. krónur fyrir gjöldum og leigu á húsnæði og var þetta samt einn af betri róðrum hjá þessum manni.

 Ekki þáði ég nú línuna, enda hart í ári hjá mér, eins og öðrum leiguliðum, og þar á ofan bætist við austan bræla hér dag eftir dag og spáir einmitt austan átt fram i næstu viku.

Leiga á þorskkvóta í dag (ef hann fæst), er um 240-250 kr. kg. og fyrir fisk sem er að seljast á mörkuðunum frá 200 til liðlega 300 krónur, þá getur verið erfitt að skauta á þessari örmjóu línu. Sem betur fer, er ég þó með flestar þær tegundir sem ég veiði í föstum viðskiptum, en það dugar ekki endalaust, enda hefur olían hækkað, beitan hækkað, leigan hækkað og í flestum tegundum, verðið lækkað. Svo það væri nú mikill munur ef að hægt væri að snúa aftur með smábátana í það kerfi sem við vorum í fyrir nokkrum árum síðan, þ.e.a.s. þorskaflahámarks kerfið, þar sem Þorskurinn var í kvóta en allar aðrar tegundir voru utan kvóta. Fyrir því ætlum við í FF að berjast.

Meira seinna.

Lundinn

Það vakti athygli mína, viðtal við Mara í Miðstöðinni í Vaktinni í síðustu viku, þar sem hann lýsir yfir áhyggjum yfir því, hve lítið sjáist af lunda og að hann hafi að undanförnu kíkt í 21 holu, en aðeins séð 2 egg. Þarna er ég nokkuð sammála Mara, því ég hef séð frekar lítið af lunda að undanförnu, en tek undir með honum um að vonandi batnar þetta þegar líður á júni og í raun og veru er kannski eðlilegt að ekki sjáist mikið af lunda um þetta leytið, enda er það fyrst og fremst holufuglinn sem á að vera að koma núna og á fyrst og fremst að vera í skylduverkunum í holunum. Veiðistofninn og ungfuglinn kemur að öllum líkindum ekki fyrr en jafnvel eftir mánuð og hefur, eins og fjölmörg dæmi hafa sýnt mér átt það til að koma jafnvel ekki fyrr en í ágúst, en til merkis um það, hversu gott útlitið er, þá var ég að tala við Val Andersen, Súlnaskers greifann, og voru þeir að ljúka sinni síðustu ferð í svartfuglsegg núna fyrir helgi. Á síðasta ári fengust aðeins 600 svartfuglsegg í suðurskerjunum, en 2600 núna (Súlnasker, Hundasker, Gerfuglasker). Svo samkv. þessu lítur þetta miklu betur út, en kannski hefði mátt taka ákvörðun um lundaveiðitímabilið í sumar seinnipartinn í júni, þegar útlitið væri orðið svolítið skýrara, en í sjálfu sér er ég sammála þeirri ákvörðun sem nú þegar liggur fyrir, að hefja veiðar 10. júli, en endurskoða svo stöðuna í lok júli.

Sjómenn til hamingju með daginn

Mjög skrítin upplifun mín á jarðskjálftanum, því ég fann vel fyrir honum þó að ég væri staddur um borð í bátnum mínum sunnan við Þrídranga, á keyrslu og sló ég snarlega af, því það var eins og ég hefði fengið í skrúfuna. Þetta sýnir okkur glöggt, hversu lítils megnug við erum í samanburði við náttúruöflin.

En ég réri þrisvar í síðusut viku og fiskaði ca. 4 1/2 tonn af blönduðum fiski.

Varðandi niðurstöðu Ríkisstjórnarinnar um Landeyjarhöfn, þá kemur hún ekki á óvart, en vonandi verður þetta bara í lagi og tilbúið 2010, en um það efast ég og þar sem ríkið ætlar sér að eiga þetta og reka, þá tel ég mjög líklegt að það verði dýrara fyrir okkur bæði að fara milli lands og eyja og að flutningar á vörum muni hækka, því að ríkið tekur alltaf sitt.

Enn einn sigurinn hjá ÍBV og enn einu sinni 2-0 og það á útivelli, til hamingju strákar.

Það er komin sól og blíða í eyjum núna, en svona aðeins vestan golukaldi. Ég ætla mér að taka frí um helgina og óska öllum sjómönnum til hamingju með daginn.

nokkrar myndir

Með 60 egg í fötunni og 20 í pokapeysunni, sem er orðin 25 ára gömul og dugar enn.

p/s er þetta ekki svipað og að vera eins og ófrísk kerling? Eini munurinn er að úr þessu koma aldrei ungar.

Sú stutta fékk að koma með í einni eggjaferðinni undir ströngu eftirliti mömmu.

og nær hér fyrsta egginu sínu, eftir að pabbi hafði rekið mömmuna í burtu.

Sú er grobbin.

Setti með eina mynd af garðinum, þar er allt að lifna við.

 

 

Er ennþá í vandræðum með tölvuna..

.. enn ætla að sjá hvort að þetta komist inn.

Smá framhald í sambandi við eggjatímann. Í gær komust þeir eggjatökumenn í skerin sunnan við eyjar og voru öll skerin hreinsuð svo að eitthvað ætti að fást af svartfuglseggjum í vikunni.

ÍBV vann sinn þriðja leik, og enn og aftur 2-0. Innilega til hamingju strákar.

Það gengur mikið á í samgöngumálum okkar eyjamanna þessa dagana, en mér sýnist að staðan sé þannig núna að í raun og veru vitum við ekkert um það hvort af þessari landeyjarhöfn verður eða ekki, en vonandi skýrist það í vikunni. Það merkilegasta þó eru þessar tölur sem menn eru farnir að tala um í dag, þ.e.a.s 14 og hálfan milljarð fyrir reksturinn í 10 ár og ef við uppreiknum þetta til næstu 30 ára og bætum síðan við kostnaði við að gera höfnina og byggja skipið, þá er ég nú farinn að hallast að því að þeir gangasinnar sem telja að þessi upphæð samtals geri meira en dugar fyrir göngum milli lands og Eyja hafi talsvert til síns máls. En sumar vilja meina að um það hafi eyjamenn ekkert að segja lengur.

Veðrið í Eyjum er búið að vera alveg frábært þessa helgi og frúin komin á kaf í garðinn, enda eru næg verkefnin þar. Ég er með nokkrar myndir úr garðinum og úr eggjaferð, en vegna tölvuvandræða næ ég þeim ekki inn. Meira seinna.

Allt á fullu í eggjatínslu hjá mér

Hef þess vegna frekar lítinn tíma til að skrifa að undanförnu, enda er eggjatínslan fyrst og fremst áhugamál og ánægja (og pínulítil líkamsrækt), og er einnig viðbót við aðra vinnu sem ég er að sinna eins og alla aðra daga.

Ég ætlaði að setja inn fína eggjamynd af mér, en tölvan er eitthvað að ergja mig og neitar myndinni, svo það kemur bara seinna, verð sennilega að fara í viðgerð með tölvuna og stórt spursmál, hvort maður noti ekki tækifærið og skipti um netþjón.

p/s

Langar að óska ÍBV strákunum innilega til hamingju með frábæra byrjun, það er greinilegt að stemmningin í liðinu er allt önnur og betri en á síðasta ári. Alltaf gaman að sjá ÍBV í fyrsta sæti, þó að aðeins séu búnar tvær umferðir.

ÁFRAM ÍBV!

Sjóstöng o.fl.

Hún byrjaði frekar illa, sjóstöngin, hjá mér og endaði frekar illa hjá öllum. Fyrir það fyrsta, þá tognaði ég á fingri á fimmtudaginn og aðstoðarmaðurinn komst ekki með og til að kóróna það, þá komst aflahæsti veiðimaðurinn frá því á síðasta ári ekki til eyja, en hann átti að vera umborð hjá mér, þannig að í staðinn fyrir að fara með fjóra veiðimenn, þá fór ég með þrjá veiðimenn. Veðrið var frekar erfitt fyrri daginn framan af, en lagaðist þegar leið á daginn. Gallinn var sá, að þegar hann loksins lægði alveg gerði alveg gríðarlega sterkan straum. Það góða við strauminn er, að í fyrsta skipti í mörg ár fékkst lúða umborð hjá mér, en sú ánægja stóð því miður ekki mjög lengi, því á leiðinni í land, fréttum við að á öðrum bát hafði fengist mun stærri lúða. Fiskiríið var að sjálfsögðu misjafnt eftir bátum, en mér sýnist aflinn umborð hjá mér hafi verið á milli 500-600 kg. Þar af helmingurinn á eina stöng.

Seinni dagurinn er öllu verri, því þegar við vöknuðum í morgunn var kominn austan 20 og var mótið slegið af kl. 8 í morgun. Þannig að lokatölur eru þessar: 37 veiðimenn veiddu samtals 7 tonn af blóðguðum fiski, mest þorsk.

Þar sem ég er hættur að tala um Bakkafjöru, þá langar mig að segja nokkur orð um Landeyjarhöfn. Í Fréttum s.l. fimmtudag, útgefið í eyjum, er viðtal við Gunnlaug Grettisson, forseta bæjarstjórnar í Vestmannaeyjum, þar sem hann segir m.a.:" Mikið af fólki er að flytja til Vestmannaeyja, vegna þess að Landeyjarhöfn er væntanleg." Ég er sammála Gulla að hugsanlega geti fólk flutt til eyja á næstunni, en ég er ansi hræddur um að það hafi lítið með Landeyjarhöfn að gera. Ég held miklu frekar, að þegar harðnar á dalnum á höfuðborgarsvæðinu, eins og nú er að gerast, þá er það alþekkt að fólk flykkist út á landsbyggðina, svo kannski má segja sem svo, að þarna séu ákveðin sóknartækifæri fyrir eyjamenn, t.d. er mjög ánægjulegt að bæjarstjórnin skuli halda áfram á mjög myndarlegan hátt að vinna að helsta stefnumáli F-listans fyrir síðustu bæjarstjórnarkosningar, þ.e.a.s. það hefur verið tekin ákvörðun um að á næstu 3 árum verði settar 700 milljónir í stórskipahöfn (og er þá reiknað með að ríkið setji 60 % á móti). Þetta er mjög ánægjulegt og í algjöru samræmi við stefnu Frjálslyndra. Einnig er mjög ánægjulegt að hér á að fara að reisa vatnsverksmiðju sem á að selja á erlendan markað, svo vissulega eru líkur á því að ný störf geti orðið til á næstunni. Einnig kemur fram í máli Gunnlaugs að mikið ásókn sé í lóðir í Vestmannaeyjum. Þetta mál þekki ég aðeins, því verktakinn sem keypti af okkur gamla húsið, hefur eftir því sem mér er sagt, sótt um nánast hverja einustu lóð sem losnar hér í eyjum, keypt upp fullt af eldri húsum, en eitthvað virðist vera lítið um framkvæmdir í bili, og spurning hvort að fjármálakreppa bankanna spili ekki stórt inni í þar eins og annarsstaðar.

Næsta vika er mjög spennandi, því að á þriðjudaginn rennur út hugsanlega síðasta tækifæri hjá bæjarstjóranum okkar, að gera tilboð i rekstur Landeyjarhafnar og í raun og veru er erfitt að segja til um það í dag, hvort af þessu verður eða ekki. það er hinsvegar nokkuð ljóst, að bærinn þarf að lækka verulega sitt tilboð og spurning hvort að þarna sé hugsanlega verið að búa til nýja fjárhagslegan bagga á eyjamönnum og í raun og veru er alveg með ólíkindum, hversu hart bæjarstjórinn sækir að fá þessa Landeyjarhöfn og virðist í dag vera tilbúinn að gera nánast hvað sem er til þess að þetta verði að veruleika, en það skýrist vonandi í vikunni.

Meira seinna.

Annasamir dagar

Það er mikið búið að gerast og enn meira framundan. Fór á sjó miðvikudag, fimmtudag og föstudag, fiskaði einhver 4 tonn, mest stórþorskur og veðurspáin segir að það verði sjóveður á morgun og hugsanlega á fimmtudag, svo ég náði næstum því að beita upp með því að beita alla helgina, en samt ekki alveg.

Um næstu helgi er ég búinn að lofa mér í sjóstöngina og heyrist mér talsvert  vera komið af þátttakendum, en veðurútlit mætti alveg vera betra.

Ég hef ekkert frétt af fundi bæjaráðsmanna og samgönguráðuneytis frá því í gær, en það vakti athygli mína að í Vaktinni s.l. föstudag er viðtal við bæjarstjórann okkar, þar sem ég gat ekki betur lesið en að hann væri að lýsa yfir áhyggjum af því, að hugsanlega væri komin upp sú staða að vegna kreppunnar í fjármálageiranum, yrði Bakkafjöruhöfn hugsanlega frestað um einhvern tíma og jafnvel um einhver ár. Þetta vakti athygli mína vegna þess, að þegar ég var búinn að landa á föstudaginn kom til mín maður og sagði mér þær fréttir, að sennilega væri búin að fresta Bakkafjöru um 2-3 ár. Ég sagðist nú ekki vera tilbúinn að trúa þessu svona, en velti þessu samt upp vegna viðtalsins við bæjarstjórann, enda hefur það sýnt sig að stundum er gott að velta upp spurningum, sem að kannski er ekki alveg fótur fyrir til þess að fá greinargóð svör við mikilvægum spurningum, eins og t.d. spurningunni sem ég velti upp fyrir viku síðan um það, hvort að möguleiki væri fyrir því að mengun vegna grjótnáms gæti orðið í nágrenni við vatnslyndir eyjamanna og langar mig að nota þetta tækifæri og þakka Ívari Atlasyni hjá Hitaveitu Suðurnesja fyrir góð svör.

Annað sem vakti athygli mína í viðtali við bæjarstjórann, er að hann segir m.a. að ósamstaða heimamanna sé ekki til þess fallinn að hjálpa okkar málstað. Þarna kemur bæjarstjórinn að mínu mati svolítið aftan af sjálfum sér, því eins og bæði hann og allir aðrir vita, sem hafa fylgst með skrifum mínum og annarra, um Bakkafjöru, þá hafa bæði ég og margir aðrir marg sinnis skorað á bæjarstjórann (m.a. skrifaði ég þetta inn á bloggsíðu bæjarstjórans) að efna til kosninga um þessa tvo valmöguleika í samgöngumálum okkar sem eftir eru, þ.e.a.s. nýjan hraðskreiðari Herjólf eða Bakkafjöru. Þessu hefur bæjarstjórinn aldrei séð ástæðu til að svara. Ég hinsvegar, hef marg lýst því yfir, að ef efnt hefði verið til kosninga og 50,01% eyjamanna eða meirihluti sagt já við Bakkafjöru, þá hefði ég einfaldlega unað þeirri niðurstöðu sáttur, svo ég held því fram að samstaða eyjamanna sé með ágætum, en samtaða eyjamanna og bæjarstjórnarinnar mætti kannski vera betri.

Meira seinna.